Qazaqstanda Islam qarjysy jónindegi halyqaralyq keńes quryldy
ASTANA. KAZINFORM — «Astana» halyqaralyq qarjy ortalyǵynda Islam qarjysy halyqaralyq keńesi quryldy. Oǵan Saýd Arabııasy, Bahreın, Malaızııa, Túrkııa, Qazaqstan jáne BAÁ sarapshylary qatysady. Bul týraly ortalyqtyń baspasóz qyzmeti habarlady.
«Astana» halyqaralyq qarjy ortalyǵy negizgi ıslamdyq qarjy ıýrısdıktsııalaryndaǵy jetekshi álemdik sarapshylardy biriktiretin jáne Qazaqstanda ındýstrııany damytýdyń jańa deńgeıin belgileýge tıis organ — Islamdyq qarjy jónindegi halyqaralyq konsýltatıvtik keńestiń qurylýy týraly jarııalady. Alǵashqy otyrys 10 jeltoqsanda Abý-Dabıde AIFC Connect Abu Dhabi aıasynda, Qazaqstannyń BAÁ-degi elshiligi alańynda ótti.
Keńes Qazaqstandaǵy ıslamdyq qarjylandyrýdy damytýdyń negizgi ıntellektýaldyq ózegi bolady: ol zańnama, sharıǵat basqarý, kapıtal naryqtary, ornyqty qarjy, tsıfrlyq sheshimder jáne halyqaralyq yntymaqtastyq jóninde táýelsiz usynymdar qalyptastyrady.
AHQO ıslamdyq qarjy baǵytynyń basshysy Mádına Tuqulova konsýltatıvtik keńestiń qurylýy — Qazaqstandaǵy ıslamdyq qarjy ındýstrııasyn nyǵaıtýdaǵy mańyzdy qadam ekenin alǵa tartty.
— Islamdyq qarjynyń negizgi ıýrısdıktsııalarynyń jetekshi sarapshylarynyń tájirıbesin biriktire otyryp, biz búkil óńir úshin sapanyń, ashyqtyqtyń jáne damýdyń jańa standarttaryn belgileýge qabiletti alań qalyptastyramyz. Keńestiń usynymdary salanyń jedel ósýine jáne AHQO-nyń ıslamdyq qarjylandyrýdyń óńirlik haby retindegi pozıtsııasyn odan ári nyǵaıtýǵa yqpal etetinine senimdimin, — dedi Tuqulova.
Al Lemrair Consultancy Company W.L.L. prezıdenti jáne bas dırektory D-r Adnan Ahmed ıÝsıf AHQO janynan Islamdyq qarjy jónindegi konsýltatıvtik keńestiń qurylýy Eýrazııa aımaǵynda ıslamdyq qarjynyń ınstıtýtsıonaldyq negizderin nyǵaıtýdaǵy strategııalyq mańyzdy kezeń ekenin atap ótti.
— Qazaqstan etıkalyq jáne turaqty qarjylyq sheshimderdi damytý úshin eleýli áleýetke ıe jáne IFAB halyqaralyq sarapshylar salany damytýdyń bolashaq baǵyttaryn aıqyndaýǵa úles qosa alatyn mańyzdy platformaǵa aınalady, — dedi Adnan Ahmed ıÝsıf.
Alǵashqy otyrysta Keńes músheleri Qazaqstan men óńirde ıslamdyq qarjylandyrýdy damytýdyń negizgi máselelerine nazar aýdardy. Sarapshylar ıslamdyq qarjy ındýstrııasynyń qazirgi jaı-kúıin, ósýdiń kedergilerin jáne Qazaqstannyń aımaqtaǵy ıslamdyq qarjylandyrýdyń jetekshi ortalyǵyna aınalý áleýetin talqylady.
2026-2028 jyldarǵa arnalǵan basymdyqtarǵa erekshe nazar aýdaryldy, olar:
— jańa ıslamdyq qarjy ónimderin shyǵarý,
— halyqaralyq ınstıtýttardyń qatysýyn keńeıtý,
— ıýrısdıktsııanyń ınvestıtsııalyq tartymdylyǵyn kúsheıtý,
— AHQO-da sharıǵat basqarý júıesin jetildirý qajettiligi.
Keńes músheleri ıslamdyq qarjy ónimderin saraptamalyq baǵalaý sapasyn arttyrýǵa, sharıǵat konsýltatıvtik organdaryna qoıylatyn talaptardy standarttaýǵa jáne sheshim qabyldaý rásimderiniń ashyqtyǵyn qamtamasyz etýge baǵyttalǵan AHQO-da sharıǵat basqarý saıasatyn engizý qajettiligin qoldady. Mundaı jumys ınvestorlardyń senimin nyǵaıtýǵa jáne Qazaqstanda halyqaralyq deńgeıde moıyndalǵan ıslamdyq qarjy standarttarynyń saqtalýyn qamtamasyz etýge múmkindik beredi.
Keńes sonymen qatar Qazaqstannyń jasyl jáne áleýmettik baǵdarlanǵan ıslamdyq quraldary salasyndaǵy áleýetin, sonyń ishinde jasyl jáne ESG-sýkýk shyǵarý múmkindikterin qarastyrdy.
Keńes quramyna mynadaı jetekshi halyqaralyq mamandar kirdi:
- D-r Samı Ál-Sývaılem (Sami Al Suwailem), Islam Damý banki ınstıtýtynyń bas dırektorynyń mindetin atqarýshy, ıslam ekonomıkasy jáne jahandyq ıslam qarjy ındýstrııasy salasyndaǵy jetekshi halyqaralyq sarapshylardyń biri.
- D-r Adnan Ahmed ıÝsıf (Adnan Ahmed Yousif) — Lemrair Consultancy Company W.L.L. prezıdenti jáne bas dırektory, Bahreın men Taıaý Shyǵystaǵy ıslam bankınginiń negizgi kóshbasshylarynyń biri.
- Professor Dato d-r Aznan Hasan (Aznan Hasan) — Malaızııa Halyqaralyq ıslam ýnıversıtetiniń sharıǵat professory, sharıǵat qadaǵalaý salasyndaǵy jetekshi halyqaralyq maman.
- Lım Seı Chong (Lim Say Cheong) — táýelsiz dırektor, ıslam bankıngi, kapıtal naryqtary jáne tsıfrlyq aktıvter jónindegi sarapshy (BAÁ).
- Fatma Chynar (Fatma Çınar) — Túrkııanyń qatysý bankteri qaýymdastyǵy bas hatshysynyń orynbasary, ıslam bankınginiń sarapshysy.
- Maııa Marıssa Malek (Maya Marissa Malek) — Sabiq Advisory (Malaızııa — BAÁ) bas dırektory, sharıǵat korporatıvtik basqarý, ESG-bastamalar jáne kapıtal naryqtary jónindegi maman.
- Mádına Tuqulova — AHQO ıslamdyq qarjy baǵytynyń basshysy, ıslamdyq qarjy jáne bıznes qaýymdastyǵynyń bas dırektory. Salanyń strategııalyq damýyna jáne halyqaralyq yntymaqtastyqqa jaýapty.
Qatysýshylar quramy Saýd Arabııasy, BAÁ, Bahreın, Túrkııa, Malaızııa jáne Qazaqstannyń ıslamdyq qarjy ındýstrııasyn damytýdyń úzdik álemdik modelderin kórsetedi.
Budan buryn Astana halyqaralyq qarjy ortalyǵy jarty jylda 2,6 mlrd dollar ınvestıtsııa tartqany belgili boldy.