AHQO-da Halyqaralyq ınvestorlar aptalyǵy ótedi
NUR-SULTAN. QazAqparat - «Astana» halyqaralyq qarjy ortalyǵy (AHQO) «Halyqaralyq ınvestorlar aptalyǵyn» ótkizýdi josparlap otyr, dep habarlaıdy ortalyqtyń baspasóz qyzmeti.
Atalmysh shara Qarjy qyzmetteri tutynýshylaryn qorǵaý, ınvestıtsııalar negizderi jáne AHQO-daǵy bıznesti júrgizý sharttary týraly aqparatpen qamtamasyz etý maqsatynda 2019 jylǵy 30 qyrkúıek 6 qazan aralyǵynda ótedi.
Halyqaralyq ınvestorlar aptalyǵy Baǵaly qaǵazdar jónindegi komıssııalardyń halyqaralyq uıymynyń (IOSCO) qoldaýymen jyl saıyn ótkizilip, oǵan 6 kontınenttiń 80 eliniń qarjylyq retteýshileri qatysady.
IOSCO – baǵaly qaǵazdar naryǵynyń retteýshi organdaryn biriktiretin halyqaralyq uıym. IOSCO músheleri baǵaly qaǵazdardyń álemdik naryǵynyń 95% -dan astamyn 115-ten astam ıýrısdıktsııalarda retteıdi.
Halyqaralyq ınvestorlar aptalyǵyn ótkizý AHQO-nyń qarjylyq qyzmet tutynýshylaryn qorǵaý boıynsha IOSCO standartyna beıildiligin dáleldeıdi. Ótken jyly IOSCO qamqorlyǵymen «AHQO Halyqaralyq ınvestorlar aptalyǵy 2018» Qazaqstannyń 7 qalasynda uıymdastyrylyp, oǵan 3500-den astam adam qatysty.
Bıylǵy Halyqaralyq ınvestorlar aptalyǵy-2019 sheńberindegi AHQO is-sharalary 30 qyrkúıek pen 6 qazan aralyǵynda Investor Awareness Roadshow atty ulttyq deńgeıdegi kampanııa sheńberinde Qazaqstannyń 6 qalasynda – Petropavl, Aqtaý, Qaraǵandy, Túrkistan, Almaty jáne Nur-Sultan qalalarynda ótedi:
30 qyrkúıek – Petropavl;
1 qazan – Aqtaý;
2 qazan – Qaraǵandy;
3 qazan – Týrkestan;
4 qazan – Almaty;
6 qazan – Nur-Sultan.
AHQO Halyqaralyq ınvestorlar aptalyǵynyń baǵdarlamasy akademııalyq jáne iskerlik toptarǵa arnalǵan tanystyrylymdar men aqparattyq sessııalar formatynda ótedi. Kúnniń birinshi jartysynda jastar men akademııalyq orta ókilderiniń qarjylyq jáne ınvestıtsııalyq mádenıetin qalyptastyrý, sondaı-aq ınvestıtsııalaý negizderi týraly aqparattandyrý maqsatynda óńirlik joǵary oqý oryndarynyń stýdentteri men professor-oqytýshylar quramyna arnalǵan dárister ótedi. Sondaı-aq bastama aıasynda memlekettik qyzmetshiler – Qazaqstan Respýblıkasy Prezıdentiniń janyndaǵy Memlekettik basqarý akademııasynyń tyńdaýshylary úshin semınarlar uıymdastyrylady.
Kúnniń ekinshi jartysynda óńirlik bızneske arnalǵan tanystyrylym ótedi, shara barysynda qarjy qyzmetteri tutynýshylaryn qorǵaý, bızneske arnalǵan AHQO-nyń múmkindikteri, Jasyl jáne Islam oblıgatsııalaryn shyǵarý erekshelikteri, AHQO-da tirkeýdiń artyqshylyqtary men rásimi jáne bilim berý baǵdarlamalary týraly baıandalady. Іs-sharanyń spıkerleri retinde qarjy qyzmetterin retteý, qarjy tehnologııalary, Jasyl jáne Islamdyq oblıgatsııalardy shyǵarý, baǵaly qaǵazdar naryǵyndaǵy ınvestıtsııalaý, sondaı-aq úzilissiz kásibı damý salasyndaǵy AHQO sarapshylary sóz sóıleıdi.
Halyqaralyq ınvestorlar aptalyǵy aıasynda, sonymen qatar, Islamdyq qarjylandyrý aptalyǵy josparlanǵan. Islamdyq qarjylandyrý ındýstrııasynyń Qazaqstanda jáne dúnıejúzinde damýynyń ózekti máseleleri boıynsha sheberlik-sabaqtary men trenıngter ótkiziledi. Islamdyq qarjylandyrý aptalyǵyn Almaty (4 qazan) jáne Nur-Sultan (6 qazan) qalalarynda ótetin Islamdyq qarjylandyrý kúnine arnalǵan konferentsııalar támámdaıdy.
Halyqaralyq ınvestorlar aptalyǵynyń qorytyndy sharasy – «Investorlar kúni» konferentsııasy 6 qazanda Nur-Sultan qalasynda ótedi. Konferentsııada AHQO sarapshylary men syrttan shaqyrylǵan spıkerler qarjylyq qyzmetteriniń keń spektri, qarjy quraldary men tutynýshylar quqyqtaryn qorǵaý turǵysynan AHQO-daǵy múmkindikter týraly áńgimeleıdi.
Qosymsha aqparat, is-sharanyń baǵdarlamasy jáne sharaǵa tirkelý týraly aqparatty myna silteme arqyly alýǵa bolady.
