AHQO Bıýrosy qazaqstandyq kompanııalardyń ınvestıtsııa tartýyna kómektesedi
«Dál osy jarty jylda jobalar men ınvestorlar qalaýynyń arasy tym alshaq ekenin baıqadyq. Sondyqtan, kompanııalarǵa ishki transformatsııa, qyzmetkerlerdi oqytý jóninde trenıng usynyp otyrmyz. IPO-ǵa shyǵý - tek qana aqsha alyp otyrý emes, IPO-dan keıingi ómir tipti qıyndaı túsedi. Investorlarmen birigip jumys isteý kerek, ashyq saıasat ustanyp, esepterdi kórsetý qajet», - dep málimdedi AHQO basqarma tóraǵasynyń orynbasary Ernur Rysmaǵambetov jýrnalısterge bergen suhbatynda.
Óz sózinde spıker otandyq kompanııalardyń IPO-ǵa shyǵý áleýetine baǵa berip, qor naryǵyna búkil kompanııalardyń shyǵýy mindet emes ekendigin atap ótti.
«Shyn máninde, barlyq jobalar IPO-ǵa muqtaj emes. Keı kompanııalarǵa jaı ǵana ınvestor nemese qor ınvestıtsııalary kerek. Sebebi, IPO - kompanııa úshin eń joǵarǵy deńgeı. Óz óndirisin keńeıtkisi keletin kompanııalar da bar. Eger qyzyqty bolsa, jyldam ósip, joǵary tabys tapsa, ár kompanııanyń múmkindigi bar dep esepteımin. Kóptegen ortasha kompanııalar bıznespen aınalysady biraq sheteldik ınvestor tartýdy oılamaıdy. Sondyqtan, olarǵa óz qabiletterin shyńdap, halyqaralyq qor naryqtaryna shyǵýy úshin quraldar men jol kartasyn usynǵymyz keledi», - dedi ol.
«Qazir sheteldik ınvestıtsııa máselesi óte ózekti bolyp otyr jáne bárine ınvestıtsııa tartýdyń durys formýlasy kerek. Munda kompanııanyń daıyndyǵy, komandanyń ınvestormen qarym-qatynas qura alýy mańyzdy. Qyrkúıek aıynan bastap kompanııalardy iriktep, ınvestıtsııa qalaı tartý kerektigin úıretip, arnaıy bilim berip, strategııamyzben qalǵan kompanııalarmen bóliskimiz keledi.. Bizdiń negizgi mindetimiz - keıs jasap, oqytý arqyly ınvestıtsııa tartý joldaryn tájirıbede kórsetkimiz keledi», - dedi AHQO ókili.
Praktıkalyq semınarǵa túrli halyqaralyq ınstıtýt ókilderi shaqyrylǵan. Olar jan-jaqtan kompanııalarǵa býhgalterlik eseptiń mańyzdylyǵyn, durys qarjy úlgisi men korporatıvti basqarý joldaryn túsindiredi.
Aıta keteıik, 2019 jyldyń 1-4 shilde kúnderi elordada Astana Finance Days qarjy forýmy ótýde. Forýmǵa álemdik sarapshylar, saıasatkerler, bıznes ókilderi jáne «Astana» halyqaralyq qarjy ortalyǵyna tirkelgen kompanııa ókilderi keledi.
