AHQO bırjasy Eýropa-Azııalyq qor bırjalary federatsııasyna múshe boldy
Federatsııanyń maqsaty men mıssııasy - Eýrazııa óńiriniń (Eýropa, Azııa, Jerorta teńizi alaby) kapıtal naryqtaryn damytýǵa, ilgeriletýge jáne olardyń yntymaqtastyq ornatýyna járdemdesý. Bul uıymnyń múshesi bolý AIX úshin bıznesti qoldaý, trenıngter men vebınarlar, zertteýler men jarııalanymdar arqyly bilim almasý, PR qoldaý, FEAS ConFEAS flagmandyq is-sharaǵa qatysý sııaqty FEAS artyqshylyqtaryn alýǵa múmkindik beredi.
AIX Basqarma Tóraǵasy Tım Bennettiń aıtýynsha, osy múshelikke qol jetkizý arqyly AIX federatsııanyń Eýropa-Azııa óńirindegi kapıtal naryqtaryn damytýǵa, qoldaýǵa jáne ilgeriletýge ári yntymaqtastyqqa óz úlesin qosýǵa qatysty kózqarasy men mıssııasyn qoldaıdy.
«Bul kapıtal naryqtaryn keńeıtý jáne tereńdetý, kapıtalǵa qoljetimdilik berýge arnalǵan qaýipsiz ári senimdi platformany qamtamasyz etý jáne Qazaqstan men óńir ishinde jáne odan tys jerlerde ınvestıtsııalaý múmkindikterin qamtıtyn AIX tujyrymdamasyna sáıkes keledi», - deıdi ol.
FEAS-tyń 26-shy jyl saıynǵy Bas Assambleıasy barysynda FEAS tóraǵasy Ahmed Saleh ál Marhýn myrza bylaı dedi:
«Búgin biz FEAS qoǵamdastyǵyna tolyq quqyly músheler retinde qosylǵan «Astana» halyqaralyq bırjasynyń qurmetti áriptesterimizge qosh keldińizder deı otyryp, FEAS barlyq músheleriniń atynan AIX-ti osy aıtýly oqıǵamen quttyqtaǵymyz keledi. Biz uzaq merzimdi jemisti yntymaqtastyqqa úmittenemiz jáne birge ortaq maqsattarymyzǵa qol jetkizýde bir-birimizdi qoldaıtyn bolamyz dep senemin».
Aıta keteıik, AHQO bırjasy 2017 jyly «Astana» halyqaralyq qarjy ortalyǵyn damytý aıasynda quryldy. 2018 jylǵy 14 qarashada Qazaqstan Respýblıkasynyń Prezıdenti Nursultan Nazarbaev AIX alańynda baǵaly qaǵazdardyń alǵashqy saýda-sattyǵyn bastap berdi. AIX aktsıonerleri quramyna AIFC, Goldman Sachs, Shanhaı qor bırjasy, Jibek joly qory jáne NASDAQ kiredi, sońǵysy AIX-ke saýda platformasyn usynady.
AIFC. 2015 jyldyń jeltoqsanynda Qazaqstan Respýblıkasynyń Prezıdenti Nursultan Nazarbaev «Astana» halyqaralyq qarjy ortalyǵyn (AIFC) qurý týraly Konstıtýtsııalyq zańǵy qol qoıdy. AHQO-nyń maqsaty qarjylyq qyzmetterdiń halyqaralyq deńgeıdegi jetekshi ortalyǵyn qurý bolyp tabylady. AHQO-nyń mindetterine qarjy qyzmetterine ınvestıtsııalaý úshin tartymdy orta qurý, kapıtaldyń jergilikti naryqtaryn damytý, olardyń halyqaralyq kapıtal naryqtarymen ıntegratsııalanýyn qamtamasyz etý jolymen ekonomıkaǵa ınvestıtsııalar tartý jatady.
FEAS. Eýropa-Azııalyq qor bırjalary federatsııasy (FEAS) 1995 jyly 16 mamyrda Stambulda quryldy, onyń negizin sol kezdegi 12 múshesi qalady. Federatsııanyń maqsaty Eýropa-Azııa óńirindegi (Eýropa, Azııa jáne Jerorta teńizi alaby) kapıtal naryqtaryn damytýǵa, qoldaýǵa, ilgeriletýge jáne yntymaqtastyqqa járdemdesý bolyp tabylady. Qazirgi ýaqytta Federatsııanyń 33 múshesi bar, olar: 20 tolyq quqyly múshe, 5 qaýymdastyrylǵan múshe, 20 elden 8 baqylaýshy. FEAS, onyń músheleri men qyzmeti týraly aqparatty federatsııanyń resmı saıtynan alýǵa bolady.
