AHQO álemniń TOP-50 ortalyǵynyń qataryna kirmek

ASTANA. QazAqparat - Aldaǵy 3 jyldyń ishinde «Astana» halyqaralyq qarjy ortalyǵy álemniń TOP-50 halyqaralyq qarjy ortalyǵynyń qataryna kiretin bolady. Bul týraly búgin atalǵan ortalyqtyń basqarýshysy Qaırat Kelimbetov aıtty, dep habarlaıdy QazAqparat tilshisi.

«Astana» halyqaralyq qarjy ortalyǵy halyqaralyq qarjy ortalyqtarynyń arasynda básekege qabilettiliktiń jahandyq reıtıngi radarynda paıda boldy. Aǵymdaǵy jyly biz 61 orynǵa ıe boldyq. Nursultan Ábishuly, taıaý ú jylda álemniń TOP-50 halyqaralyq qarjy ortalyǵynyń qataryna kirýdi josparlap otyrmyz. Búgingi kúnniń ózinde quzyretimizge 88 kompanııa tirkeldi jáne biz 2020 jyldyń sońyna deıin 500 kompanııaǵa deıin kompanııa tirkeledi dep josparlap otyrmyz», - dedi Qaırat Kelimbetov AHQO Bırjasynyń alǵashqy saýda-sattyǵyn iske qosý sharasyna qatysqan QR Prezıdenti Nursultan Nazarbaevqa qarata.

Onyń aıtýynsha, AHQO Bırjasynda alǵashqy tranzaktsııa bastaldy. Qarjy mınıstrliginiń eýrooblıgatsııalaryn, «Qazaqtelekom» oblıgatsııalaryn ornalastyrý tabysty aıaqtaldy.

«Biraq, munyń barlyǵynyń marjany «Qazatomónerkásip» kompanııasynyń ornalastyrylýy bolyp otyr. Búgin bizdiń bırjamyz «Qazatomónerkásip» aktsııalaryn satý úshin bastaý sátiniń tuǵyrnamasy qyzmetin atqarady»,-  dedi Qaırat Kelimbetov.

Aıta keteıik, búgin Elbasy Nursultan Nazarbaev «Astana» halyqaralyq qarjy ortalyǵy Bırjasynyń alǵashqy saýda-sattyǵyn iske qosqan bolatyn.

Buǵan deıin «Qazatomónerkásip» aktsııalary «Astana» halyqaralyq qarjy ortalyǵy Bırjasynda satylymǵa shyǵarylǵanyn, 

sondaı-aq Biryńǵaı jınaqtaýshy zeınetaqy qory «Qazatomónerkásip» aktsııalaryn satyp alǵanyn habarlaǵan edik.