AHAT-tiki daıyn, QMDB-niki ýaıym: Meshitterde qıylǵan neke sany týraly aqparat alý nege qıyn

ASTANA. KAZINFORM – Imamdar musylmandyq nekeni qımastan buryn AHAT bóliminde tirkelgen kýálikti talap etýi tıis. Qazaqstan musylmandary dinı basqarmasynyń erejesi osy. Demek, meshit jýrnalynda tirkelgen neke sany AHAT bólimi usynǵan derekpen sáıkes kelýi kerek. Agenttik tilshisi sandardy sáıkestendirip kórmek boldy...

Eń áýeli Ulttyq statıstıka bıýrosyna habarlastyq. Ondaǵylar bizge byltyrǵy bir jyl men bıylǵy 3 aıda tirkelgen neke sany týraly aqparatty lezde-aq berdi.

Belgili bolǵandaı, byltyr elimizde 120 851 neke tirkelipti. Al bıyl alǵashqy úsh aıda 26 733 jup máńgilik bir bolýǵa serttesip, zań júzinde bekitken. 

Musylmandyq neke týraly aqparatty bilý úshin QMDB-ǵa habarlastyq. Basqarmanyń baspasóz qyzmeti: «Bizge de sol aqparat kerek bolyp jatyr» dedi de qoıdy, eshqandaı málimet usynbady. Jón siltep, meshitterge jeke-jeke habarlasýǵa keńes berdi.

Ádette, jas jubaılar neke qııý rásimin ortalyq meshitterde ótkizýdi jón kóretini belgili. Bul rette, Astana qalasynda ornalasqan Áziret Sultan meshitine, respýblıkalyq bas meshitke habarlastyq. Ondaǵy din qyzmetkerleri QMDB ruqsat berse ǵana qandaı da bir aqparat beretinin jetkizdi. Biraq, basqarmanyń baspasóz qyzmeti sol kúıi únsiz qaldy. 

QMDB-dan úmit úzip, óńirlerdegi meshit ımamdarymen baılanysqa shyǵyp kórdik. Nekeler meshit jýrnalynda ári bazada tirkeletinin bildik. Jýrnaldar muraǵat retinde saqtalady da. Alaıda naqty sanyn eshkim aıta almady. 

«Ondaı statıstıka júrgizilmeıdi. Biraq, sanaýǵa bolar», - dedi Pavlodar oblysynyń bas ımamy Joldas Berdimuratov.

Túsingenimiz, meshit basshylyǵy neke sany týraly aqparatty bere alady. Bul úshin jýrnaldaǵy nemese bazadaǵy sandardy kóterse boldy. Al olaı etpeýine ne sebep? Ol sandar AHAT usynǵan málimettermen sáıkes keler me eken? Máseleniń túp-tórkini osynda sııaqty...