AHAT óz fýnktsııalaryn HQO-ǵa bergennen keıin kommertsııalyq qyzmet kórsete me

ALMATY. QazAqparat- 1 shildeden bastap AHAT fýnktsııalary memlekettik korporatsııaǵa beriledi. Bul rette tirkeý organdary kommertsııalyq qyzmet kórsete ala ma? Bul saýalǵa óńirlik kommýnıkatsııalar qyzmetinde Almaty qalasy boıynsha «Azamattarǵa arnalǵan úkimet» memlekettik korporatsııasy fılıaly dırektorynyń orynbasary Ásem Bolatbaekova tolyq jaýap berdi, dep habarlaıdy QazAqparat tilshisi.

«Búginde AHAT bólimsheleriniń mamandary memlekettik qyzmetker bolyp sanalady, sondyqtan olardyń jas jubaılarǵa kommertsııalyq qyzmet kórsetýge quqyǵy joq. Olardyń mindeti - ótinishti qabyldaý, tirkeý kúnin belgileý, tirkeýdi júrgizý jáne qujat berý. Al Azamattarǵa arnalǵan úkimet - kommertsııalyq qyzmet kórsetetin korporatsııa. Sondyqtan bizge ótken qyzmetkerler de naryqqa qatysýshy bolady. Bul degenimiz - olardyń jas jubaılarǵa arnalǵan naryqtaǵy barlyq kommertsııalyq qyzmetterdi kórsete alatynyn bildiredi», - dedi spıker.

Osylaısha, AHAT qyzmetkerleri fýnktsııalary HQO-ǵa aýysqannan keıin neke qııý rásimine, fondyq mýzykalyq súıemeldeýge, foto jáne beınetúsirilim oryndaryn ıntererlik resimdeýge, nekeni jas jubaılardyń qalaýyna qaraı shaqyrǵan jerlerine baryp tirkeý boıynsha kommertsııalyq qyzmetter kórsete alady.

Bul jaǵdaıda jas jubaılar basqa kompanııalardyń nemese memlekettik korporatsııalardyń qyzmetterin ózderi tańdaý quqyǵy bar. Bul nekeni memlekettik tirkeýge áser etpeıdi, ol ózgerissiz qalady, al saltanatty rásim qyzmeti tek nekege turýshylardyń qalaýy boıynsha.

Spıkerdiń aıtýynsha, Almaty qalasynyń AHAT qyzmetkerleriniń 80% - dan astamy HQO fılıaldaryna aýysyp, qoldanystaǵy Memlekettik qyzmetterdi kórsetetin bolady.

«Bıznes-protsester ózgermeıdi. Munda jańa aqparattyq júıe nemese jańa qyzmet engizilmeıdi, memlekettik qyzmetter standarttary qoldanystaǵy, qyzmet kórsetý tártibi men merzimderi burynǵydaı bolady. Eń bastysy, biz Ádilet mınıstrligine súıenemiz. Onyń artynda búgingi kúnge deıin berilgen fýnktsııalar qalady. Bul azamattyq hal aktilerin tirkeýdi ádisnamalyq qamtamasyz etý jáne baqylaý. Eldegi AHAJ jumysynyń jańa kezeńin tek oń ózgerister kútiledi», - dep atap ótti ol.

Memlekettik korporatsııanyń málimetinshe, jyl basynan beri AHAT jelisi boıynsha Almaty HQO arqyly 33 377 qyzmet kórsetilgen.

«Tarıfterge keletin bolsaq, AHAT-ta tegin ári aqylaı qyzmetter bar. Mysaly, 1 shildeden bastap nekeni tirkeý 3874 teńge, al ózara kelisim boıynsha nekeni buzý 7728 teńge bolady. Týýdy, ólimdi tirkeý sııaqty áleýmettik mańyzdy qyzmetter tegin»,- dedi Ásem Bolatbaekova.