Aǵzadaǵy antıdeneler tıtri joǵary bolsa, vaktsına salýdyń qajeti joq – sarapshy

NUR-SULTAN. QazAqparat – «Astana medıtsına ýnıversıteti» KeAQ juqpaly aýrýlar jáne klınıkalyq epıdemıologııa kafedrasynyń dotsenti, qalalyq juqpaly aýrýlar ortalyǵy bólim meńgerýshisi Záýresh Smaǵulova «Koronavırýsqa qarsy antıdeneleri bar turǵyndarǵa vaktsına alý qajet pe?» degen suraqqa jaýap berdi, dep habarlaıdy QazAqparat tilshisi.

«Kez kelgen juqpaly aýrýdyń ereksheligi – ımmýnıtet túzilip, antıdenelerdiń belgili bir mólsherde damýy. Sondyqtan kez kelgen ınfektsııadan keıin árdaıym ımmýnıtet iske qosylady jáne antıdeneler shyǵady. Al olardyń denemizde qansha ýaqyt saqtalatyny aǵzanyń ózine baılanysty. Eger antıdeneler tıtri aıtarlyqtaı joǵary bolsa jáne uzaq ýaqyt saqtalsa, vaktsına salýdyń qajeti joq. Al eger antıdene tıtri ýaqyt óte kele tómendese nemese tórtinshi, altynshy aıda nólge deıin tússe, onda ımmýndaý máselesi týyndaýy múmkin», - dep túsindirdi dáriger Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, koronavırýspen aýyrǵandarǵa vaktsına salmaýdyń basty sebebi – antıdenelerdiń bolýy.

«Vaktsınatsııanyń máni de sol – ony aǵzaǵa engizgende, aǵza oǵan ımmýnıtet, ıaǵnı antıdeneler shyǵarý arqyly jaýap beredi. Sondyqtan aǵzada antıdeneler bar bolsa, qaıta vaktsına egýdiń qajeti joq», - dedi Z. Smaǵulova.

QR DSM Ulttyq Qoǵamdyq densaýlyq saqtaý ortalyǵy Sanıtarlyq-epıdemıologııalyq saraptama jáne monıtorıng ǵylymı-praktıkalyq ortalyǵy dırektorynyń orynbasary Manar Smaǵuldyń aıtýynsha, Dúnıejúzilik densaýlyq saqtaý uıymynyń keńesine sáıkes, koronavırýs ınfektsııasymen aýyrǵan adamdarǵa alty aı boıy vaktsınatsııadan bas tartý usynylady.

«Kelesi aılarda jańa derekter paıda bolsa, usynymdar da jańartylady. Koronavırýspen aýyrǵandarǵa alty aıdan keıin vaktsına alýǵa bolady», - deıdi M. Smaǵul.