Aǵza transplantatsııasy: Elimizde 61 bala búırekke, 21 bala baýyrǵa muqtaj
ASTANA. QazAqparat - Ulttyq ǵylymı ana men bala densaýlyǵy ortalyǵy basshysynyń orynbasary Venera Altynova Qazaqstanda qansha bala aǵza aýystyrýǵa muqtaj ekenin aıtyp berdi, dep habarlaıdy QazAqparat tilshisi.
«Bizdiń ortalyqta 2012 jyldan bastap aǵza aýystyrý, aq qan aýrýy kezdeskende jilik maıyn aýystyrý otalary jasalyp keledi. Qazaqstanda búgingi tańda, ókinishke qaraı, búırekke 61 bala, baýyrǵa 21 bala muqtaj. Donor baýyrdy kútken balalar óte kishkentaı. Máselen, bizdiń ortalyqtaǵy baýyr transplantatsııasy bólimindegi jasy eń kishkentaı bala 6 aılyq. Endi biz ol bala bir jarym jasqa tolǵansha baýyr taýyp, aýystyrýymyz kerek. Óıtkeni, ary qaraı keshigip qalamyz», - deıdi Venera Altynova.
Onyń aıtýyna qaraǵanda, osyndaı kúrdeli jaıǵa tap bolǵan balalarǵa búgingi tańda baýyry nemese búıregin tek týysqandary ǵana beretin kórinedi.
«Búırekti biz tiri donorlardan jáne mı ólimine shaldyqqan adamdardan alamyz. Bir máıitten 7 organdy alyp, 7 naýqasqa múshe aýystyrý otasyn jasaýǵa bolady. Organ alynatyn tiri donor (ata-anasy nemese týysqandary) nemese qaıtys bolǵan adamnyń jasy 58-den asyp ketpeýi kerek. Máıitten biz baýyrdy ala almaımyz», - deıdi ol.
Venera Altynova óz sózinde atap ótkendeı, ortalyqta búırek transplantatsııasy 6 jyl, jilik maıy transplantatsııasy 6 jyl, baýyr transplantatsııasy 4 jyldan beri jasalyp keledi.
«Eresekterge qaraǵanda balalardyń jaıy jeńildeý. Sebebi, balalarǵa kóbinese áke-shesheleri nemese týysqandary donor bolyp keledi. Byltyrdan beri máıitten alynatyn aǵzalardyń transplantatsııasy azaıdy. Munyń sebebi kóp. Bizde zań boıynsha, qaıtys bolǵan adamnyń denesinen belgili bir aǵzasyn eshkimnen ruqsat suramaı-aq alýǵa qaqymyz bar. Alaıda bizdiń halyqtyń kózqarasy buǵan qaıshy dese de bolady. Esińizde bolsa, byltyr bir naýqastan aǵza alyp, sońy daý-damaıǵa aınalyp ketti», - deıdi Venera Altynova.
Ortalyq basshysynyń orynbasarynyń aıtýyna qaraǵanda, Túrkııada Mehmet Haberal degen ataqty transplantolog bar. Venera Altynova sol mamannan «Túrkııa tranplantatsııa jasaý jaǵynan úshinshi orynda tur. Buǵan qalaı qol jetkizdińizder?» dep suraǵanyn aıtady.
«Túrkııada transplantatsııa úshin aǵzanyń 50 paıyzy tiri donordan, 50 paıyzy qaıtys bolǵan adamnan alynady eken. Mehmet Haberaldyń aıtýynsha, Túrkııada transplantatsııa týraly aqparat quraldarynda apta saıyn málimet taratylyp otyrady eken. Al bizde Qazaqstanda bul másele jıi aıtyla bermeıdi», - deıdi ol.
Venera Altynova jyl saıyn búırekke muqtaj balalardyń qatary 14-18-ge kóbeıip otyratynyn aıtady. Alaıda ondaı balalardyń keıbiriniń áke-sheshesiniń joq bolýy nemese qan tobynyń sáıkes kelmeýi, ata-anasynyń densaýlyǵynyń bolmaýy, donordyń tabylmaýy jaǵdaıdy qıyndata túsedi.
«Sondaı jaǵdaılarda máıitten aǵza ala alsaq, balalarǵa jaqsy múmkindik týar edi. Donor bolmaǵandyqtan, kóp balalar qaıtys bolyp ketedi. Al bizde otalardyń basym kópshiligi sátti - balanyń da, transplanttyń da aman qalý kórsetkishi 98 paıyz. Óz kórsetkishterimizdi ózge eldermen salystyryp kórgende Eýropadaǵy barlyq eldermen deńgeıimiz birdeı ekeni anyqtaldy», - deıdi Venera Altynova.
