Aǵymdaǵy jyly zeınetaqynyń 25 paıyzǵa artýy 1,6 mln. el azamattaryn qamtydy

Bul týraly búgin QR Parlamenti Májilisinde ótken Úkimet saǵatynda QR Eńbek jáne halyqty áleýmettik qorǵaý mınıstri Gúlshara Ábdihalyqova málim etti, dep habarlaıdy QazAqparat.

«Elbasy Joldaýyna sáıkes, bıylǵy jyldyń qańtarynan bastap zeınetaqy mólsherin arttyrýdyń kezekti satysy qoldanysqa endi. Zeınetaqyny 25 paıyzǵa arttyrý 1,6 mln. el azamattaryn qamtydy. Bul rette bazalyq zeınetaqy - 5 myń 981 teńgege, tómengi zeınetaqy kólemi bazalyq zeınetaqyny qosa eseptegende 18 myń 325 teńgege, joǵary zeınetaqy mólsheri 40 myń teńgege jetti. Qazirgi ýaqytta zeınetaqymen qamtamasyz etýdiń ár deńgeıinde júıeli ózgertýlerdi qarastyratyn zeınetaqy tólemderin kóterý strategııasyn ázirleý isi aıaqtalyp keledi. Sonymen birge, tabysy tómen bolǵan qart adamdardyń áleýmettik qorǵalýyn qamtamasyz etetin zeınetaqy júıesiniń bazalyq deńgeıinde bazalyq zeınetaqyny kezeń-kezeńimen tómengi kúnkóris deńgeıiniń 75 paıyzyna deıin arttyrý josparlanýda», dedi mınıstr.

Onyń aıtýynsha, zeınetaqy tóleý júıesinde oryn alǵan qıǵashtyqtardy joıa otyryp jáne azamattardyń burynǵy eńbekaqysyna sáıkestigin qamtamasyz ete otyryp zeınetaqy tólemderin esepteýdiń tártibine parametrlik ózgerister engizý kózdeledi. Bul ózgerister nátıjesinde 2015 jylǵa qaraı yntymaqty zeınetaqynyń kólemin 2009 jylǵy kórsetkishke qaraǵanda 1,8 esege, al odan keıingi 5 jylda taǵy úshten birine arttyrý qarastyrylady.