Aǵymdaǵy jyly UBT tapsyrý formaty ózgermeıdi - vıtse-mınıstr
ASTANA. Aqpannyń 20-sy. QazAqparat /Marlan Jıembaı/ - Aǵymdaǵy jyly Ulttyq biryńǵaı test tapsyrý formaty esh ózgerissiz qalady. Bul týraly búgin QR Bilim jáne ǵylym vıtse-mınıstri Mahmetqalı Sarybekov elordada ótken UBT ótkizýdi uıymdastyrý jáne daıyndyq máseleleri boıynsha keńeıtilgen májiliste málim etti.
Vıtse-mınıstrdiń aıtýyna qaraǵanda, is júzinde UBT formaty ózgermegenimen, ótken jyly eki formatta, atap aıtqanda testtik jáne emtıhandyq formatta ótkizý týraly usynystar bolǵan. Onyń paıymdaýynsha, mektep bitirýshi test tapsyrǵannan keıin joǵary oqý ornyna túsý úshin qaıtadan 3 pánnen synaq tapsyrtýdyń esh qajeti joq. «Mundaı eki nusqaǵa qoǵam, Densaýlyq saqtaý mınıstrligi sondaı-aq birqatar depýtattar qarsylyq bildirdi. Degenmen qazirgi ýaqytta basqa sıpattaǵy usynystar da túsýde. Máselen, Parlamenttiń birqatar depýtattary pedagogıkalyq mamandyqtar boıynsha qosymsha shyǵarmashylyq emtıhan engizý qajet dep sanaıdy. Olardyń paıymdaýynsha, bul bolashaq mamandyq ıesiniń balalarmen jumys isteý múmkindigin, psıhologııalyq daıarlyǵyn, oqýshylarmen til tabysa alatyndyǵyn jáne kásibı jaǵynan jaramdylyǵyn baǵalaýǵa múmkindik bermek. Eger biz olardyń bul usynystaryn qabyldasaq erteń basqa baǵyt ókilderi de sony talap etpeı me», dedi óz sózinde vıtse-mınıstr. Sonymen qatar onyń aıtýynsha, aǵymdaǵy jyly túlekterdiń jınaǵan balldarynyń tómengi shegi 50, jalpy medıtsınanyń medıtsınalyq mamandyqtar úshin 55 ball bolmaq. Test tapsyrýǵa beriletin ýaqyt sol kúıinde qalyp, 3,5 saǵatty quraıdy. Al jınaǵan ballyńa senimsizdik bildirseń test nátıjesi jarııalanǵannan sátten bastap kelesi kúngi saǵat 13,00-ge deıin shaǵym-ótinish berýińe bolady.
«Naýryzdyń 10-y men sáýirdiń 10-y aralyǵynda elimizdiń barlyq mektepterinde synyp jetekshileriniń basshylyǵymen túlekter UBT-ǵa qatysý úshin ótinish blankterin toltyrady», degen vıtse-mınıstr keıbir jaǵdaılarda synyptaǵy úlgerimi nashar oqýshylardy synaqqa jibermeı qoıatyn oqıǵalardyń da kezdesetindigin atap ótip, oǵan jol berilmeý kerektigin basa aıtty.
Onyń basa nazar aýdarǵan taǵy bir máselesi test suraqtaryna qatysty órbidi. «Test saýaldary jyl saıyn tekserilip, suryptalady. Qazirgi ýaqytta Abylaıdyń atynyń tisi qansha, pálenbaıdyń qansha áıeli bolǵan degen sııaqty anekdotqa aınalǵan suraqtar joq», dep nyqtaı tústi.
Test tapsyrmalary mektep baǵdarlamasyna sáıkes keledi, osyǵan oraı ony ázirleýge mektep oqýlyqtarynyń avtorlary da tartylǵan. Ótken jyldyń qarasha aıynda test tapsyrmalaryna saraptama júrgizilip, jaramsyz suraqtar alynyp tastalǵan. «Qańtar aıynda test tapsyrmalarynyń bazasy jabylyp, memlekettik dárejedegi qupııa rejimine aýystyryldy», dedi M.Sarybekov.
