Aǵymdaǵy jyly UBT-nyń ortasha baly 1,5 paıyzǵa artyp, 86,6 baldy qurady - Bilim mınıstri
ANA. 13 maýsym. QazAqparat /Marlan Jıembaı/ - Aǵymdaǵy jyly UBT-nyń ortasha baly 1,5 paıyzǵa artyp, 86,6 baldy qurady. Bul týraly búgin Úkimet otyrysynda QR Bilim jáne ǵylym mınıstri Baqytjan Jumaǵulov aıtty.
Onyń atap ótýinshe, osymen segizinshi márte ótkizilip otyrǵan UBT-da oń tájirıbeler qalyptasqan. «Meniń oıymsha, munan jaqsysyn oılap tappaımyz. Jyldan jylǵa oń jetildirilip otyrylady. UBT formaty aǵymdaǵy jyly ózgergen joq. Mazmuny boıynsha kóptegen suraqqa, atap aıtqanda 1500 saýal aýystyryldy. Sondaı-aq, ótken jyly durys qoıylmaǵan 109 tapsyrma alynyp tastaldy»,-dedi ol.
UBT osy formatta jalǵasý kerektigin atap ótken mınıstrdiń aıtýynsha, osy jyly da UBT-ǵa qatysty syn kóp bolǵan. «Meniń oıymsha, zań buzýshylyqtar da boldy. Memlekettik qupııalar týraly zańnyń buzylýy boıynsha tergeý amaldary júrgizilýde. Tolyqtaı alǵanda ótken jylmen salystyrǵanda ortasha 1,5 paıyzǵa artyp, 86,6 baldy qurady. Aǵymdaǵy jyly UBT-ny 129 myń adam tapsyrdy. Bul da jaqsy kórsetkish»,-dedi mınıstr.
B. Jumaǵulovtyń atap ótýinshe, 2014-2015 jyldarǵa deıin stýdentterden synaq alý UBT formatynda jalǵasa beredi. Al, 2014-2015 jyldary beıimdik mekteptiń paıda bolýyna baılanysty keshendi jáne ulttyq testileý engiziletin bolady.
Óz kezeginde Úkimet basshysy «UBT-ny ınstıtýt retindegi ustanymnan bas tartpaımyz. Jetildirý máselesine keler bolsaq, ondaı jaıttar bar. Bastalǵan jumystardy toqtatpaý qajet.UBT jaqsy tetik. Sondyqtan ony odan ári jetildirý kerek»,-dedi K. Másimov.
