Aǵymdaǵy jyly retteletin salalarǵa salynatyn ınvestıtsııa kólemi 230 mlrd. teńgege jetedi - M.Ospanov
ASTANA. 1 qazan. QazAqparat - Aǵymdaǵy jyly retteletin salalarǵa salynatyn ınvestıtsııa kólemi 230 mlrd. teńgege jetedi. Bul týraly búgin Úkimet otyrysynda QR Tabıǵı monopolııalardy retteý agenttiginiń tóraǵasy Murat Ospanov málim etti.
Onyń atap ótýinshe, búgingi tańda elimizde jańǵyrtý, qyzmet sapasyn kóterý qajettigin, sonymen qatar aktıvterdiń joǵary tozý dárejesin eskere otyryp, retteletin salalarǵa ınvestıtsııany kóbeıtý qamtamasyz etilýde. Máselen, onyń sózine qaraǵanda, ótken jylǵy retteletin salalarǵa quıylǵan ınvestıtsııa kólemi 208,8 mlrd. teńgeni quraǵan. «Bul 2011 jyldyń deńgeıinen 46 paıyzǵa artyq. 2013 jylǵy ınvestıtsııa kólemi 230 mlrd. teńge deńgeıinde josparlanyp otyr», - dedi M.Ospanov.
Agenttik basshysynyń aıtýynsha, árbir monopolıske ınvestıtsııalyq baǵdarlama ázirleý ári ony júzege asyrý mindeti júktelgen. Sonyń arqasynda ınvestıtsııa kólemin arttyrýǵa qol jetkizilmek. «Bul tıimdi mehanızm ár teńgeni maqsatty paıdalanyp, onyń jumsalýyn baqylaýǵa múmkindik beredi», - dedi ol.
