Aǵymdaǵy jyly respýblıkada epıdemıologııalyq jaǵdaı turaqty jáne ótken jyldyń kórsetkishterinen tómen - QR DSM
ASTANA. 5 tamyz. QazAqparat - Búgin QR Densaýlyq saqtaý mınıstrliginde elimizdegi aǵymdaǵy epıdemıologııalyq jaǵdaı boıynsha QR DSM Memlekettik sanıtarlyq-epıdemıologııalyq qadaǵalaý komıteti basshylarynyń qatysýymen baspasóz máslıhaty ótkizildi.
Bul aqparatty QR Densaýlyq saqtaý mınıstrliginiń baspasóz qyzmeti taratyp otyr.
Jalpy, respýblıkada 2011 jyldyń 7 aıy ishinde turǵyndardyń dıfterııa, juqpaly aýrýlarmen aýrýy boıynsha epıdemıologııalyq jaǵdaı turaqty jáne ótken jyldyń kórsetkishterinen tómen bolyp otyr. Ótken kezeńde Qazaqstanda oba, tyrysqaq, týlıaremııa, dıfterııa, polıomıelıt, qylaý, trıhenellez sııaqty basqa da asa qaýipti juqpaly, parazıtarlyq aýrýlardyń jaǵdaılary tirkelgen joq.
Byltyrǵy jylmen salystyrǵanda 18 ınfektsııa boıynsha aýrý kórsetkishteri azaıdy.
Turǵyndardyń qutyrý dertine shaldyǵý kórsetkishteri de tómendep keledi. Aıtalyq, elimiz boıynsha 2009 jyly 14 jaǵdaı, 2010 jyly 6 jaǵdaı, aǵymdaǵy jyly 4 jaǵdaı tirkeldi. Jáne bul oqıǵalardyń kópshiligi negizinen dárigerlerge ýaqytynda qaralmaǵandyqtan bolyp otyr. Mysaly, Qyzylorda oblysynda 2006 jyly dúnıege kelgen balany ıt betinen qaýyp alǵan, biraq ata-anasy tek eki aı ótken soń ǵana medıtsınalyq kómekke júginip, aqyry jaǵdaı qaıǵyly aıaqtaldy.
Respýblıkanyń birqatar óńirinde qalyptasqan ystyq aýa-raıyna qaramastan, profılaktıkalyq jáne epıdemııaǵa qarsy is-sharalar nátıjesinde ótkir ishek aýrýlary kórsetkishin 13,1, balalar arasynda 15,4 paıyzǵa tómendetýge qol jetkizildi.
Degenmen, atqarylǵan is-sharalarǵa qaramastan, taǵamdy daıyndaý jáne paıdalaný kezinde qajetti sanıtarlyq-epıdemıologııalyq talaptardy saqtamaýy, sapasyz sýdy, jemister men kókónisterdi tutynýy sebepti tamaqtan ýlaný oqıǵasy oryn aldy. Atap aıtqanda, 2011 jyldyń 28 shildesinde Almaty-Atyraý poıyzynan 39 bala tamaqtan ýlaný belgilerimen aýrýhanaǵa jetkizilse, Almaty oblysy Talǵar aýdanynyń Besqaınar aýylynda 28 shilde - 1 tamyz kúnderi aralyǵynda 19 adamnyń «A» gepatıtine shaldyǵý jaǵdaıy tirkeldi.
Barlyq aıtylǵan epıdemıologııalyq jaǵdaılar boıynsha densaýlyq saqtaý jáne sanıtarlyq-epıdemıologııalyq qadaǵalaý organdary epıdemııaǵa qarsy jáne emdik is-sharalar ótkizip, qazir de jalǵastyryp jatyr.
Azamattardyń jappaı aýrýǵa shaldyǵý oqıǵalaryna kináli laýazymdy tulǵalarǵa qatysty ákimshilik sharalar qabyldanýda.
Jalpy, aǵymdaǵy jyldyń ótken kezeńinde respýblıkanyń memlekettik sanıtarlyq-epıdemıologııalyq qadaǵalaý organdary sanıtarlyq zańnama talaptaryn buzý oqıǵalary boıynsha 22393 aıyppul salyp, sanıtarlyq talaptarǵa jáne normalarǵa sáıkes kelmeıtin 519 obektiniń qyzmetin ýaqytsha toqtatyp, 891 isti tergeý organdaryna ótkizdi.
