Aǵymdaǵy jyly paıdalanylmaı jatqan 2,5 mln. gektar jer anyqtaldy - B. Jámishev
ASTANA. 19 qarasha. QazAqparat - Aǵymdaǵy jyly aýyl sharýashylyǵy maqsatyndaǵy jerlerdi túgendeý barysynda paıdalanylmaı jatqan 2,5 mln. gektar alqap anyqtaldy.
Bul týraly búgin Úkimet otyrysynda Óńirlik damý mınıstri Bolat Jámishev málim etti. Esterińizge sala keteıik, Qazaqstanda aýyl sharýashylyǵy maqsatyndaǵy jalpy 90 mln. gektar jerdi túgendeý josparlanǵan. Onyń ishinde 2012 jyly 30,6 mln. gektar jer túgendeldi, sondaı-aq 2013 jyly da osyndaı kólemde aýyl sharýashylyǵy aınalymyndaǵy jerler tekserildi. «Aǵymdaǵy jyly túgendeýdiń sońǵy nátıjesi tıisti kestege sáıkes jeltoqsannyń aıaǵynda bekitiledi jáne zańnamalyq tártipke sáıkes tıisti sharalar aldaǵy jyly qabyldanatyn bolady. Sonymen qatar túgendeýdiń aldyn ala málimetterine sáıkes, 4440 sýbekti 2,5 mln. gektar jerdi paıdalanbaı otyr. Onyń ishinde 313 myń gektary egistik bolsa, sonyń 13,3 myń gektary sýarmaly jerler. Atap aıtqanda, sýarý júıeleri tıisti tehnıkalyq jaǵdaıda emes. Túgendeýden ótken 164,2 myń gektar sýarmaly jerdiń tek 93 myń gektarynda sýarý júıesi tıisti jaǵdaıda. 38 myń gektar jerde qaıta qalpyna keltirý jumystaryn atqarý qajet»,-dedi mınıstr.
