Aǵymdaǵy jyly oryn alǵan túrli apattardyń saldaryn joıýǵa 15,7 mlrd. teńgeden astam qarajat bólindi - TJM

Sóz arasynda jyl basynan bergi oryn alǵan tótenshe oqıǵalarǵa toqtalǵan toqtalǵan mınıstr, aldaǵy ýaqytta álgindeı apattardyń aldyn alý úshin qajetti sheshimderdiń barlyǵy qabyldanǵanyn atap ótti.

Tótenshe jaǵdaılar mınıstriniń deregine qaraǵanda, bıyl Shyǵys Qazaqstan oblysy avtojoldaryndaǵy qar burqasyndarynan 538 adam qutqarylyp, 1 myń 120 adam kóshirilgen. «Aqpannyń úshinshi onkúndiginde Almaty oblysynda asa qıyn jaǵdaı qalyptasty. Sol sátten bastap 14 oblys aýdandarynyń 42 eldi mekeniniń jekelegen aýmaqtaryn sý basty. Aýa temperatýrasynyń aıtarlyqtaı kóterilýi nátıjesinde qardyń tez erýi, jaýyn-shashynnyń tolastamaýy Almaty oblysy Aqsý aýdany Qyzylaǵash sý qoımasynyń qarqyndy túrde tolýyna alyp keldi», degen mınıstr budan ári Qyzylaǵash apatynyń sebep-saldaryn aıtyp shyqty.

Onyń sózine qaraǵanda, apat kezinde Qyzylaǵash, Aqtoǵan, Eginsý, Alajıde aýyldarynan 385 adam qutqarylyp, 1500 adam kóshirilgen. Ózen arqyly 9 myń 146 adam ótkizilip, 508 zardap shekkenderge, onyń ishinde 30 balaǵa medıtsınalyq jáne psıhologııalyq kómek kórsetilgen. 120 sharshy shaqyrym aýmaqta izdeý jumystary júrgizilgen. Ókinishke qaraı, 1930 aýyl turǵyndary arasynan 45 adam qaza bolǵan.

«Barlyq jaǵdaılarda el azamattary qıynshylyq kezde jalǵyz qalmady. Memleket basshysynyń nusqaýlary boıynsha Pavlodar, Batys Qazaqstan, Almaty, Shyǵys Qazaqstan oblystarynda zardap shekkenderge qoldaý kórsetý jáne tótenshe jaǵdaılar saldaryn joıý jóninde Úkimetten bastap ártúrli qurylymdar jan-jaqty sharalar qabyldady. Osy maqsattarǵa Úkimettiń, oblys ákimdiginiń rezervinen, qoǵamdyq qorlar men ulttyq kompanııalar qarajatynan 15,7 mlrd. teńgeden astam aqsha bólindi. Bul bizdiń qarjy júıemizdiń naqtylyǵyn, bıýdjettik josparlaýymyzdyń mándiligin jáne memlekettiń óz azamattaryn qorǵaý jónindegi den qoıý jedeldigin kórsetedi. Tek Qyzylaǵash bógetiniń buzylýy saldaryn joıýǵa 7,89 mlrd. teńge bólingen», - dedi V. Bojko