Aǵymdaǵy jyly ónerkásip ónimi kóleminiń ósý qarqyny 7,5 paıyzdy quraıdy
ASTANA. Qyrkúıektiń 8-i. QazAqparat /Marlan Jıembaı/ - Aǵymdaǵy jyly ónerkásip ónimi kóleminiń ósý qarqyny 7,5 paıyzdy quraıdy. Bul týraly búgin Úkimet otyrysynda QR Ekonomıkalyq damý jáne saýda mınıstri Janar Aıtjanova málim etti.
«2010 jylǵy ónerkásip ónimi kóleminiń ósý qarqyny aldyn ala boljanǵan 3,3 paıyzdan 7,5 paıyzǵa deıin ósedi dep kútilip otyr», dedi mınıstr.
Onyń paıymynsha, oń úrdiske taý-ken ónerkásibindegi boljanǵan ósim 4,4 paıyzdan 5,1 paıyzǵa artýy áser etken. «Sebebi aǵymdaǵy jyly metall kenderi men taý-ken ónerkásibiniń basqa da salalaryndaǵy óndirý kólemi birshama joǵary bolady dep boljanýda. Atap aıtqanda, 2010 jyldyń qańtar-shilde aılaryndaǵy metall kenin óndirý 6,1, kómir 6, munaı 5,9 jáne tabıǵı gaz óndirý 5,1 paıyzǵa ósti», dedi ol óz sózinde.
Mınıstrdiń aıtýyna qaraǵanda, óńdeý salalaryndaǵy ósim boljam boıynsha 2 paıyzdan 11,9 paıyzǵa deıin artady dep kútilýde. Máselen, aǵymdaǵy jyldyń 7 aıynda azyq-túlik ónimderiniń kólemi 14,8, hımııa ónerkásibi 70,5, al mashına jasaý óndirisi 55, 7 paıyzǵa ósim kórsetken.
