Aǵymdaǵy jyly mektepke baratyn 26 myń jambyldyq jetkinshek jańa bilim berý baǵdarlamasymen oqıdy
Bul týraly búgin «Memleket basshysynyń 5 ınstıtýttyq reformasyn júzege asyrý boıynsha 100 naqty qadam» Ult josparyn júzege asyrý máselelerine arnalǵan brıfıng barysynda Jambyl oblysynyń ákimi Kárim Kókirekbaev málim etti.
«Ult josparynyń 76, 77, 78, 79 qadamdarynda Memleket basshysy bilim berý júıesin reformalaý boıynsha zor mindetter júktedi. Oblysta 2 mektep jańartylǵan standarttarmen 12 jyldyq bilim berý eksperımenti baǵdarlamasymen jumys isteýde», - dedi ol.
Sonymen qatar onyń atap ótýinshe, pedagogtardyń kásibı biliktiligin arttyrý úshin ótken jyly 3745 muǵalim men 33 mektep dırektory arnaıy kýrstardan ótken.
«Jańa oqý jylynan bastap 1-shi synypqa baratyn shamamen 26 myń bala jańa bilim berý baǵdarlamasymen oqıtyn bolady», - dedi K.Kókirekbaev.
