Aǵymdaǵy jyly mektep bitirgen túlekter elimizdiń barlyq óńirlerinde uıymdastyrylǵan 154 test tapsyrý oryndarynda UBT tapsyrady
ASTANA. Aqpannyń 20-sy. QazAqparat /Marlan Jıembaı/ - Aǵymdaǵy jyly mektep bitirgen túlekter elimizdiń barlyq óńirlerinde uıymdastyrylǵan 154 test tapsyrý oryndarynda ulttyq biryńǵaı testiden ótedi. Bul týraly búgin QR Bilim jáne ǵylym vıtse-mınıstri Mahmetqalı Sarybekov elordada ótken UBT ótkizýdi uıymdastyrý jáne daıyndyq máseleleri boıynsha keńeıtilgen májiliste málim etti.
«Úsh aıdan keıin bizdiń mektep bitirýshilerdiń aldynda úlken, mańyzdy, olardyń ómirindegi aýqymdy is-sharalardyń biri - ulttyq biryńǵaı test ótedi. Ony pedagogıkalyq ujymdardyń 11 jyl boıy atqarǵan jumystarynyń nátıjesi dep qabyldaýymyz kerek. Soǵan oraı jan-jaqty daıyndyqpen attalǵan is-sharanyń durys ótýine muryndyq bolaıyq», dep atap ótken vıtse-mınıstrdiń sózine qaraǵanda, aǵymdaǵy jyly birqatar oblys aýdandarynyń basshylarynan, atalǵan óńirlerden saılanǵan Májilis, Senat depýtattarynan UBT boıynsha qosymsha test ótkizý oryndaryn ashý týraly usynystar túsken. «Birden atap óteıin, Bilim jáne ǵylym mınıstrligi kerisinshe UBT boıynsha pýnktterdiń sanyn qysqartý ustanymynda. Sebebi atalǵan oryndardyń qysqarýy olardy úılestirý jáne baqylaý jasaýdy uymdastyrýdy jaqsarta túsýge múmkindik beredi. Sondaı-aq qosymsha oryndar ashý qosymsha qarjy men adam kúshterin qajet etedi. Biz kez kelgen aýylda, eldi mekende mundaı oryndardy asha almaımyz. Jalpy mınıstrlik saıasaty atalǵan pýnktterdi yqshamdaýǵa baǵyttalǵan», dedi ol.
Vıtse-mınıstr keltirgen derekterge sáıkes aǵymdaǵy jyly túlekter elimizdiń barlyq óńirlerinde uıymdastyrylǵan 154 test tapsyrý ortalyǵynda óz baqtaryn synaıdy. Bundaı ortalyqtardyń 3-eýi elordaǵa tıesili. Olar L.Gýmılev atyndaǵy Eýrazııa ulttyq ýnıversıteti, S.Seıfýllın atyndaǵy Qazaq memlekettik agrotehnıkalyq ýnıversıteti jáne Qazaq gýmanıtarlyq zań ýnıversıteti bazasynda uıymdastyrylǵan.
