Aǵymdaǵy jyly Qazaqstanda sábı ólimi 5 paıyzǵa tómendedi
ASTANA. 7 qyrkúıek. QazAqparat - Búgin QR Densaýlyq saqtaý mınıstrliginde selektorlyq rejimde QR Densaýlyq saqtaý mınıstri Salıdat Qaıyrbekovanyń jetekshiligimen bala ólim-jitimin tómendetý boıynsha shuǵyl sharalar qabyldaýǵa arnalǵan respýblıkalyq shtabtyń kezekti otyrysy ótti.
Jıynda elimizdegi náresteler ólimine qatysty ahýal jáne halyqaralyq tehnologııalardy engizý jaıy qaraldy. Bul týraly mınıstrliktiń baspasóz qyzmetinen habarlandy.
Mınıstrlik málimetinshe, Qazaqstanda sońǵy 5 jyldyń ishinde náresteler ólimi-jitimi 1,4 esege, al aǵymdaǵy jyldyń alǵashqy jarty jyldyǵynda 5 paıyzǵa tómendedi. Degenmen, Qyzylorda, Qostanaı, Atyraý jáne Aqtóbe oblystarynda bul kórsetkishtiń ósimi baıqalady. Osyǵan oraı mınıstr jergilikti atqarýshy organdardy neonatolog dárigerler, jańa týǵan sábılerdi kútýmen aınalysatyn meıirbıkelerdi daıarlaý jáne qaıta daıarlaý jumystaryn kúsheıtýge shaqyrdy.
«Mınıstrlik tek sońǵy 2 jyldyń ishinde respýblıkalyq bıýdjet qarajaty esebinen shetelderdiń klınıkalarynda 157 neonatolog, akýsher-gınekolog, balalar reanımatolog-anestezıology, neonataldy hırýrg, meıirbıkelerdi oqytty. Aǵymdaǵy jyly taǵy 56 mamandy shetelderge oqýǵa jiberý josparlanyp otyr. Sondaı-aq, mınıstrlik 4 myńnan astam pedıatrdy jáne 3,5 myń akýsher-gınekologty oqytty», - dedi mınıstr. Oǵan qosa, alǵashqy medıtsınalyq-sanıtarııalyq kómek deńgeıindegi dárigerlerdi (pedıatrlar, meıirbıkeler, akýsherler, áleýmettik qyzmetkerler) oqytýǵa bıýdjetten qarajat qarastyrylǵan. Perzenthanalardy medıtsınalyq qurylǵylarmen jaraqtandyrýǵa respýblıkalyq bıýdjetten 2011 jyly 3,8 mlrd. teńge, 2012 jyly 2,9 mlrd. teńge bólindi. Sonymen qatar, mınıstr jergilikti atqarýshy organdardyń nazaryn birqatar óńirlerde neonatolog mamandar jetispeıtinine aýdardy. «Óńirlerge jiberiletin jas mamandarǵa barynsha jaǵdaı jasap, saralanǵan eńbekaqy tóleý júıesine kóshý kerek», - dedi mınıstr.
