Aǵymdaǵy jyly Qazaqstanda alǵash ret Parkınson aýrýyna ota jasala bastaıdy

Bul týraly búgin Astanada Respýblıkalyq neırohırýrgııalyq ǵylymı ortalyǵynyń damytý boıynsha dırektory, neırohırýrg Shyńǵys Shashkın málim etti.

«Búgin biz neırohırýrgııa salasynyń jańa, áleýetti jáne joǵary suranysqa ıe fýnktsıonaldyq neırohırýrgııany óz ortalyǵymyzda engizýdemiz. Bul Qazaqstan tájirıbesinde alǵash ret qoldanylǵaly jatqan sala. Ol Parkınson, essentsıaldyq tremor, talma aýrýlary syndy júıke júıesiniń fýnktsıonaldyq aýytqýlaryn hırýrgııalyq tásilmen emdeýge negizdelgen», - dedi Sh.Shashkın fýnktsıonaldyq neırohırýrgııa salasyna arnalǵan jıynda.
Onyń aıtýynsha, kelesi jyldan bastap ortalyqta Parkınsonnyń túrli deńgeıdegi aýrýlaryna 25-ke jýyq ota jasalady dep kútilýde. Búgingi tańda el medıtsınasyna atalmysh jańa tehnologııany sátti engizý úshin kómekke sheteldiń birqatar mamandaryn Qazaqstanǵa tartý jónindegi kelissózder júrgizilgen. Sonymen qatar klınıkada AQSh, Germanııa, Ulybrıtanııa jáne Reseı elderinde bilimderin shyńdap kelgen osynaý kúrdeli júıke júıesiniń otasyn jasaýǵa qabiletti birneshe maman bar. Eń alǵashqy otany 2013 jyldyń mamyr aıynda ótkizý josparlanǵan.

«Bıyl biz Parkınson, essentsıaldyq tremor jáne dıstonııa dertterin emdeýdiń jańa tásilderin engizbekpiz. Ol mıdiń tereń qabattaryna áser etý arqyly aýrýdyń belgilerin joıýǵa baǵyttalǵan. Bul operatsııalardyń effektisi asa joǵary. Atalmysh tásil aýrýdyń bastapqy kezeńinde aýyzdyqtap, patsıentti qoǵamdyq ortaǵa qaıta qosýǵa múmkindik beredi», - dep atap ótti dáriger.

Bas mamannyń aıtýynsha, osyndaı otany sheteldik klınıkalarda jasatý úshin kem degende 60-70 myń eýro jumsaýǵa týra keledi. Eger atalmysh tehnologııa keń óris taýyp jatsa, óz azamattarymyz memlekettik kvotanyń negizinde tegin emdele alady.

Sh.Shashkınniń sózine qaraǵanda, qazirgi ýaqytta elimizde 16 myńnan astam Parkınson aýrýyna shaldyqqan adam bar.

«Bul zamanaýı tásil Astanada sátti engizilgennen keıin, Almaty, Qaraǵandy jáne Shymkent qalalaryndaǵy otandyq ortalyqtarmen tájirıbe bólisý arqyly tehnologııany aımaqtarǵa taratý kózdelýde», - dep túıdi sózin Sh.Shashkın.