Aǵymdaǵy jyly «QazAgro» esebinen aýyl sharýashylyǵy jumystaryn 177 mıllıard teńgege qarjylandyrý qarastyrylýda - Aýyl sharýashylyǵy mınıstri
ASTANA. 21 shilde. QazAqparat - Búgin Aqordada Memleket basshysy Nursultan Nazarbaevtyń tóraǵalyǵymen Qazaqstannyń 2011 jylǵy áleýmettik-ekonomıkalyq damýynyń mańyzdy máseleleri jóninde jumys babyndaǵy keńes ótkenin QazAqparat buǵan deıin habarlaǵan bolatyn.
Keńeste Aýyl sharýashylyǵy mınıstri Asyljan Mamytbekov egin oraǵynyń barysy týraly baıandama jasady.
- Aǵymdaǵy jyly jalpy egistiktiń alqaby, byltyrǵy deńgeıde, 21,1 mıllıon gektardy quraıdy. Onyń 16,3 mıllıon gektaryn - dándi daqyldar, onyń ishinde 14,1 mıllıon gektaryn - bıdaı alyp jatyr. Maıly daqyldar - 1,8 mıllıon gektarǵa, maqta - 15 myń gektarǵa, qant qyzylshasy - 21,1 myń gektarǵa, kartop, basqa da kókónister - 177,5 myń gektarǵa egilgen. Jalpy alǵanda, egin alqaptaryn ártaraptandyrý úrdisi júrip jatyr.
2010 jylmen salystyrǵanda, basymdyqty daqyldardyń alqaptary ósip otyr, onyń ishinde jem-shóp alqaptary - 39 myń gektarǵa, kúnbaǵys alqaptary - 63 myń gektarǵa, soıa - 8 myń gektarǵa, zyǵyr -73 myń gektarǵa, burshaq ónimderi - 26 myń gektarǵa ósip otyr.
Agroónerkásiptik sektordy qarjylandyrý boıynsha barlyq sharalar qabyldanýda. «QazAgronyń» esebinen aǵymdaǵy jyly 177 mıllıard teńge qarjy qarastyrylyp otyr. Onyń 94 mıllıard teńgesi - kóktemgi dala jumystary men egin oraǵyna arnalǵan. Qalǵan qarajattyń esebinen bıyl biz áleýmettik-kásipkerlik korporatsııalardyń kepildigimen, úlken jeńildiktermen 17 mıllıard teńge qarjylandyrdyq.
Osylaısha, bıylǵy jyl jaıly bolmaq, aýyl sharýashylyǵy taýarlaryn óndirýshi kóptegen usaq sharýashylyqtar «QazAgro» arqyly nesıe alyp, egin egý jumystaryn ýaqtyly, sapaly jáne tolyq kólemde júrgize aldy. Bıylǵy jyl aýyl sharýashylyǵy úshin jaıly jyl bolyp otyr. Jáne qarjylandyrý jónindegi qabyldanǵan osynaý barlyq sharalar óndiristiń kólemine laıyqty áserin tıgizedi degen úmittemiz, dedi mınıstr óz baıandamasynda,
Keńestiń jumysyna Premer-Mınıstr Kárim Másimov, Prezıdent Ákimshiliginiń Basshysy Aslan Mýsın, Prezıdenttiń kómekshisi Baqyt Sultanov, Aýyl sharýashylyǵy mınıstri, Ekonomıkalyq damý jáne saýda mınıstri Qaırat Kelimbetov qatysty.
