Aǵymdaǵy jyly halyqaralyq jańa 8 avıabaǵdar ashylady
ASTANA. 13 sáýir. QazAqparat - Aǵymdaǵy jyldyń aıaǵyna deıin «Eır Astana» jáne «Skat» kompanııalary
Almaty-Gonkong, Astana-Ulan-Batyr, Almaty-Hoshımın, Astana-Beıjiń, Astana-Qazan, Astana-Tashkent, Astana-Baký jáne Almaty-Qazan baǵyttarynda jańa halyqaralyq baǵyttar ashýdy josparlap otyr. Bul týraly QR Kólik jáne kommýnıkatsııa mınıstrliginde vıtse-mınıstr Azat Bekturovtyń tóraǵalyǵymen ótken májiliste áýe kompanııalarynyń basshylary málim etti.
Árbir jańa halyqaralyq baǵdardy ashý úshin Qazaqstannyń áýe bıligi quqyqtyq negizdi qalyptastyrý maqsatynda úlken jumys atqaratyndyǵyn atap ótken jón. Máselen, aǵymdaǵy jyly naýryzda QR Kólik jáne kommýnıkatsııa mınıstrligi Gonkongpen ózara túsinistik týraly memorandýmǵa qol qoıdy, Monǵolııanyń áýe bıligimen kelissózder júrgizdi. Aldaǵy ýaqytta Qytaı, Úndistan, Iordanııa jáne Grýzııa elderiniń áýe bıligimen kezdesýler ótkizý josparlanyp otyr.
Jańa halyqaralyq áýe baǵdarlarynyń ashylýy týrızm salasyn, elder arasyndaǵy saýda-ekonomıkalyq qatynastardy damytýǵa serpin berip, sondaı-aq, otandyq áýejaılardyń tabysyn ulǵaıtýǵa múmkindik týǵyzady.
Esterińizge sala ketsek, Elbasy kólik vedomstvosyna 7 saǵattyq ushý shegindegi álemniń iri qalalarymen tikeleı áýe qatynasyn ashýdy tapsyrǵan bolatyn. Ótken jyly Almaty-Tbılısı, Almaty-Samara, Shymkent-Ystambul, Astana-Omby jańa baǵdarlary ashylǵan bolatyn.
