Aǵymdaǵy jyly elordalyq 140 túlek «Altyn belgige» úmitti
ASTANA. Aqpannyń 20-sy. QazAqparat /Marlan Jıembaı/ - 2009-2010 oqý jylynda elordalyq túlekterdiń 140-y «Altyn belgiden», al 117-si úzdik attestattan úmitti. Bul týraly búgin QR Bilim jáne ǵylym vıtse-mınıstri Mahmetqalı Sarybekov elordada ótken UBT ótkizýdi uıymdastyrý jáne daıyndyq máseleleri boıynsha keńeıtilgen májiliste aıtty.
«2009-2010 oqý jylynda bas qalanyń bilim berý júıesinde 79 bilim mekemeleri jumys istese, onyń 65-i memlekettik jáne 14-i memlekettik emes, sonymen qatar 1 keshki mektep bar. Atalǵan bilim oshaqtarynda 3577 bolashaq túlek bilim alýda», dedi vıtse-mınıstr.
Onyń aıtýyna qaraǵanda, jyldan jylǵa elordalyq túlekterdiń UBT-dan jınaǵan balldarynyń kórsetkishi jaqsaryp keledi. Máselen 2003-2004 oqý jyldarynda orta kórsetkish 61,2 bolsa, ótken jyly ol 81,5 paıyzǵa jetti. Jalpy astanalyq túlekter UBT tapsyrýdyń nátıjeleri boıynsha respýblıkada aldyńǵy oryndardan kórinýde.
Astana qalasynda ótken jyldyń qorytyndysy boıynsha eń joǵary nátıjelik kórsetkish 123 ball bolǵanyn atap ótken ol «bul kórsetkish № 38 mektep lıtseıdiń túlegi A.Qusaıynova men № 22 mektep gımnazııanyń oqýshysy K.Moldabaevaǵa tıesili. Sonymen qatar 100 balldan joǵary jınaǵan mektep bitirýshilerdiń sany - 414, ıaǵnı elorda túlekteriniń 16,4 paıyzyn quraıdy», dedi óz sózinde.
M.Sarybekovtiń aıtýynsha, ótken jylǵy UBT-nyń qorytyndysyna sáıkes elordanyń 4 mektebi respýblıkanyń úzdik 100 mektebi qataryna engen. Olar: «Zerde» daryndy balalar mektebi, № 38 mektep lıtseı, daryndy er balalarǵa jáne qyz balalarǵa arnalǵan qazaq-túrik lıtseıleri.
