Aǵymdaǵy jyly elordada 1,4 mln. sharshy metr turǵyn úıdi paıdalanýǵa berilmek
ASTANA. 3 maýsym. QazAqparat /Marlan Jıembaı/ - Aǵymdaǵy jyly elordada 1,4 mln. sharshy metr turǵyn úıdi paıdalanýǵa berý josparlanýda. Bul týraly búgin elordada Astananyń keleshektegi damýy máselesine arnalǵan keńeste Astana qalasynyń ákimi Imanǵalı Tasmaǵambetov málim etti.
Sońǵy jyldarda qurylys sektoryndaǵy qarqyndy dınamıka joǵalmaǵanyn basa aıtqan qala basshysy: «Eger sońǵy 3 jylda shamamen 4 mln. sharshy metr turǵyn úı paıdalanýǵa berilse, aǵymdaǵy jyly taǵy 1,4 mln. sharshy metr baspanany paıdalanýǵa berý josparlanýda»,-dedi.
Qala basshysynyń paıymynsha, memlekettik qoldaýdyń arqasynda úleskerlik turǵyn úı qurylysynyń máseleleri 95 paıyzǵa sheshilgen. 35 myń úleskerdiń qatysýyndaǵy 218 turǵyn úı kesheniniń qurylysy aıaqtalǵan. «5944 úleskerdiń qatysýymen qazirgi ýaqytta qalyp otyrǵan 25 nysandy aıaqtaý aǵymdaǵy jylǵa josparlanyp otyr. Sondaı-aq, 2011 jyldyń sońyna deıin 2005-2007 jyldarǵa jáne 2008-2010 jyldarǵa arnalǵan Memlekettik baǵdarlamany júzege asyrý tolyǵymen aıaqtalatyn bolady»,-dedi I. Tasmaǵambetov.
Sondaı-aq, qala basshysynyń atap ótýinshe, 2011-2014 jyldarǵa arnalǵan turǵyn úı qurylysynyń jańa baǵdarlamasy bastaldy. Bul oraıda shamamen 1 mln. sharshy metr turǵyn úı paıdalanýǵa beriledi. Bul Myńjyldyq alleıasy aýdanyn, Han Shatyr saýda oıyn-saýyq ortalyǵynyń batys jaǵynan, sondaı-aq áýejaı aınalma jolynan Qabanbaı batyr dańǵyly boıymen Syǵanaq kóshesine deıingi qurylysty qarqyndy damytýǵa múmkindik beredi.
