Aǵymdaǵy jyly elimizde tumaý jáne JRVI-ǵa shaldyǵý 10,1 paıyz azaıdy - Densaýlyq saqtaý mınıstrligi
ASTANA. 4 sáýir. QazAqparat - Aǵymdaǵy jyly elimizde tumaý jáne jedel respıratorlyq vırýsty ınfektsııaǵa (JRVI) shaldyǵý 10,1 paıyzǵa azaıdy.
Bul aqparatty QR Densaýlyq saqtaý mınıstrliginiń baspasóz qyzmeti taratyp otyr.
Atalǵan vedomstvonyń Memlekettik sanıtarlyq-epıdemıologııalyq qadaǵalaý komıtetiniń aqparatyna qaraǵanda, elimizde epıdemıologııalyq jaǵdaı turaqty.
2012 jyldyń birinshi toqsanynda ótken jyldyń uqsas kezeńimen salystyrǵanda botýlızmmen syrqattanýshylyq deńgeıi 5,3 ese, epıdemııalyq parotıtpen syrqattanýshylyq - 2,7 ese, jiti vırýstyq gepatıt - 2,7 ese, saryp aýrýy - 34,8, qyshyma - 34,1, jiti ishek ınfektsııalarynyń toptary - 20,8, salmonellez- 14,2, pedıkýlez - 10,4, tynys alý aǵzalarynyń týberkýlezy - 7,3, merez 6,0 paıyzǵa azaıǵany baıqalady.
Turǵyndardyń asa qaýipti ınfektsııalarmen, bezgekpen, ish súzegimen, paratıfpen, dıfterııamen, polıomıelıtpen, sirespemen aýyrý jaǵdaıy tirkelgen joq.
«JRVI jáne tumaý maýsymy aıaqtalýda. 2010-2011 jyldyń epıdemııalyq maýsymymen salystyrǵanda aǵymdaǵy jyly JRVI-men jáne tumaýmen syrqattanýshylyq 10,1 paıyzǵa azaıǵany baıqalady. Aǵymdaǵy jylǵy epıdmaýsymda tumaý aldyńǵy maýsymǵa qaraǵanda 30 paıyzǵa az tirkeldi», - delingen habarlamada.
Vedomstvonyń atap ótýinshe, tumaýmen syrqattanýshylyq boıynsha turaqty epıdemıologııalyq jaǵdaı halyqty tumaýǵa qarsy vaktsınatsııalaýdyń 1,3 esege artýymen, profılaktıkalyq jáne epıdemııaǵa qarsy is-sharalardyń ýaqtyly júrgizilýimen baılanysty.
