Aǵymdaǵy jyly eksport kólemi 59 mlrd. AQSh dollaryn quraıdy - mınıstr
ASTANA. 16 aqpan. QazAqparat /Rýslan Ǵabbasov/ - Aǵymdaǵy jyly Qazaqstannyń eksport kólemi 59 058,4 mln. AQSh dollaryn quraıdy.
Bul týraly búgin bıylǵy jylǵa arnalǵan makroekonomıkalyq kórsetkishter boljamyn naqtylaý týraly Úkimet otyrysynda Ekonomıkalyq damý jáne saýda mınıstri Janar Aıtjanova málim etti.
«2011 jyly eksport kólemi boljam boıynsha 59 058,4 mln. AQSh dollaryn qurap, budan buryn maquldanǵan boljammen salystyrǵanda 5 515,2 mln. AQSh dollaryna joǵary bolady»,-dedi mınıstr.
J. Aıtjanovanyń sózine qaraǵanda, eksport boıynsha kórsetkishterdiń joǵary bolýy negizinen aýyl sharýashylyǵy taýarlary men negizgi metaldarǵa álemdik baǵa boljamynyń joǵary bolýyna baılanysty qalyptasyp otyr.
«2011 jyly ımport boljam boıynsha 33 768,9 mln. AQSh dollaryn quraıdy. Maquldanǵan boljamnan 464,1 mln. AQSh dollaryna joǵary»,-dedi vedomstvo basshysy.
