Aǵymdaǵy jyly bastyrylǵan astyqty saqtaýǵa qatysty másele týyndamaıdy - QR AShM

ASTANA. 8 qarasha. QazAqparat - Qazaqstandaǵy qoımalar aǵymdaǵy maýsymda astyq saqtaýǵa jetkilikti bolady. Bul týraly primeminister.kz Aýyl sharýashylyǵy mınıstrligine silteme jasap habarlady.

«Astyq saqtaýǵa arnalǵan bar syıymdylyqtardyń jalpy kólemi 24,6 mln. tonnany quraıdy, bul aǵymdaǵy maýsymnyń astyǵyn saqtaýǵa jetkilikti», - delingen vedomstvo málimdemesinde.Sonymen, respýblıkada qoımalardyń jalpy syıymdylyǵy shamamen 13,9 mln. tonna bolatyn 214 lıtsenzııalanǵan astyq qabyldaý kásiporny jumys jasaıdy jáne aýyl sharýashylyǵy taýarlaryn óndirýshilerde 10,7 mln. tonna kóleminde astyq saqtaýǵa múmkindik beretin qoımalar bar. «Aǵymdaǵy jyldyń 1 qarashasyndaǵy jaǵdaı boıynsha astyq qabyldaý kásiporyndaryna shamamen 6 mln. tonna bıylǵy astyq bastyryldy, onyń ishinde jumsaq bıdaı - 5,2 mln. tonna», - atap ótilgen AShM málimetinde. Esterińizge sala keteıik, qazirgi ýaqytta aýyl sharýashylyǵy taýarlaryn óndirýshiler 20,7 mln. tonna dándi daqyl jınady. Astyqtyń ortasha shyǵymdylyǵy gektaryna 13,3 tsentnerdi qurady, bul ótken jylǵy kórsetkishten gektarynan 3,8 tsentnerge joǵary.