Aǵymdaǵy jyly Almatyda Boks akademııasynyń qurylysy bastalady
ASTANA. 19 qańtar. QazAqparat /Marlan Jıembaı/ - Aǵymdaǵy jyly Almatyda Boks akademııasynyń qurylysy bastalady. Bul týraly búgin elordada QR Boks federatsııasynyń prezıdenti Tımýr Qulybaev málim etti.
«Qazaqstan Boks federatsııasy» qaýymdastyq úlgisindegi zańdy tulǵalar uıymy Atqarýshy komıtetiniń otyrysynda onyń 2010 jylǵy qyzmetine oń baǵa bergen T. Qulybaev: «Biz AIBA-men birlesip, Almaty qalasynda Boks akademııasyn ashý týraly mańyzdy sheshim qabyldadyq», - dedi.
Onyń atap ótýinshe, 1-2 jyldyń ishinde Almatyda shańyraq kóteretin Boks akademııasy búkil dúnıejúziniń tóreshileri men jattyqtyrýshylarynyń qaıtadan biliktilikten ótý ornyna aınalmaq. «Biz osy jyly qurylysty bastaımyz. Qarjy jáne demeýshiler taptyq. Meniń oıymsha ol bizdiń jattyqtyrýshylar men tóreshilerdiń óz deńgeılerin kóteretin nysanyna aınalady. Ekinshiden, is júzindegi álemniń barlyq sporttyq fýnktsıonerleri Almatyǵa turaqty túrde keletin bolady ári bizge olardy jetistikterimizben, eldegi bokstyń damý jaǵdaıymen tanystyrýǵa múmkindik alamyz», - dedi T.Qulybaev.
