Aǵymdaǵy jyly 994 shaqyrym jeli jáne 7 qazandyq jańǵyrtylady - TKSh agenttigi
ASTANA. 26 shilde. QazAqparat - Aǵymdaǵy jyly 994 shaqyrym jeli jáne 7 qazandyq jańǵyrtylady.
Bul týraly búgin QR Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokınniń qatysýymen ótken vedomstvonyń alqa májilisinde aıtyldy.
Ótken jyly Memleket basshysynyń tapsyrmasy boıynsha Úkimet Turǵyn úı-kommýnaldyq sharýashylyǵyn jańǵyrtý baǵdarlamasyn bekitti ári onyń aıasynda elimizdiń barlyq óńirlerinde kóppáterli turǵyn úılerge jóndeý júrgizý bastaldy.
«Kommýnaldyq sektorda aǵymdaǵy jyly quny 16,2 mlrd. teńge bolatyn 70 jobany iske asyrý kózdelgen. 994 shaqyrym jelilerdi jáne 7 qazandyqty jańǵyrtý josparlanyp otyr. 2012 jyldyń birinshi jarty jylyna 8,1 mlrd. teńge somasynda qarastyrylǵan qarajat jergilikti atqarýshy organdarǵa tolyq kólemde aýdaryldy. Aǵymdaǵy jyly jóndeýdi talap etetin jelilerdiń úlesin, máselen, jylýmen jabdyqtaý jelisin 61 paıyzǵa deıin, elektrmen jabdyqtaý jelisin 71 paıyzǵa deıin, gazben jabdyqtaý jelisin 53 paıyzǵa deıin azaıtý kútilip otyr», - delingen agenttiktiń baspasóz qyzmeti taratqan habarlamada.
Sonymen qatar «Aq bulaq» baǵdarlamasynyń aıasynda aǵymdaǵy jyly sýmen jabdyqtaý jáne sý burý jelilerin salý, qaıta jańartý, jańǵyrtý is-sharalaryn 116,9 mlrd. teńge kóleminde qarjylandyrý kózdelip otyr. Sonyń ishinde qalalardaǵy sýmen jabdyqtaý jáne sý burý júıelerin damytýǵa 47,5 mlrd. teńge (104 joba), aýyldyq eldi mekenderdegi sýmen jabdyqtaý júıesin damytýǵa 42,2 mlrd. teńge (238 joba) bólinedi.
