Aǵymdaǵy jylǵy Qazaqstanǵa kelgen eńbek-mıgranttarynyń sany 30 myń adamdy qurady

Búgin QR Parlamenti Senatynyń jalpy otyrysynda QR Eńbek jáne halyqty áleýmettik qorǵaý mınıstri Gúlshara Ábdihalyqova osylaı málim etti,  dep habarlaıdy QazAqparat. 

 «Zań boıynsha jyl saıyn elimizde eńbek-mıgranttaryna arnaıy kvota bólinip keledi. Máselen, aǵymdaǵy jyly kvota boıynsha ekonomıkalyq belsendi, eńbekke jaramdy azamattaryna 0,75 paıyzdyq úleste eńbek-mıgranttary Qazaqstanǵa kelý kerek bolatyn. Biraq daǵdarys saldarynan, ishki naryqtaǵy jumys oryndarynyń qysqarýyna oraı kvotamen bekitilgen 60 myń eńbek-mıgranttarynyń ornyna 30 myńǵa jýyq eńbek-mıgranttary ǵana keldi. Olardyń basym bóligi birinshi, ekinshi sanattaǵy bilikti mamandar. Sonymen birge TMD elderinen kelgen zańdy eńbek-mıgranttar sany 1 myń 943 adamdy ǵana quraıdy. Alaıda, Іshki ister mınıstrliginiń derekteri boıynsha zańsyz eńbek-mıgranttarynyń sany zańdy jolmen kelgenderden áldeqaıda basym», deıdi mınıstr.

 Onyń aıtýynsha, elimizge zańsyz jolmen kelgen eńbek-mıgranttarynyń sany bir jyldary 300 myńǵa deıin jetken degen málimetter de bar. Bıylǵy jyly elimizde zańsyz júrgen eńbek-mıgranttary úshin arnaıy is-sharalar uıymdastyrylyp, olar birneshe márte eline qaıtarylǵan. «Bundaı problema áli de barshylyq. Onyń aldyn alý úshin kelesi jyly Parlamentke kóshi-qon týraly jańa redaktsııadaǵy zań jobasyn usynbaqshymyz. Sol qujatta eńbek-mıgranttaryna arnaıy bap qarastyramyz», dedi G. Ábdihalyqova.