Aǵymdaǵy jylǵy birinshi toqsanda elimizde 90 tehnıkalyq baıqaý ortalyqtary ashylady

Bul týraly búgin Astanada ótken baspasóz máslıhatynda Kólik jáne kommýnıkatsııa vıtse-mınıstri Asylbek Dúısebaev aıtty.

Avtokólikterdegi qaýipsizdikti qamtamasyz etý maqsatynda olarǵa tehnıkalyq baıqaý júrgizý jeke ortalyqtardyń qaraýyna berildi. Atap aıtqanda, osy tehnıkalyq baıqaýdan ótkizýdiń jańa tártibi damyǵan elderdiń tájirıbesine negizdelip otyr.

Vıtse-mınıstrdiń sózine qaraǵanda, tehnıkalyq baıqaýdan ótkizýdiń merzimi men avtokólikter parametrlerin tekserýdiń talaptary burynǵy qalpynda qalady.

Aıta keteıik, tehnıkalyq qadaǵalaýdyń qabyldanǵan jańa júıesi aıasynda tekserýden ótýge negizdelgen qujattar 8-den 3-ke deıin qysqardy. Sonymen qatar, 2012 jyldyń qańtarynan bastap kólikterdi tehnıkalyq baıqaýdan tirkelgen aýmaǵyna qaramastan kez kelgen ortalyqta ótkizýge bolady.

Munymen qosa, atalǵan ortalyqtardyń kórsetken qyzmet sapasyna jaýapkershilik deńgeıi bekitildi.