Aǵymdaǵy jyldyń tamyzynda bir qyzmetkerdiń ortasha aılyq ataýly jalaqysy 80789 teńgeni qurady
ASTANA. Qazannyń 12-si. QazAqparat - Aǵymdaǵy jyldyń tamyzynda Qazaqstandaǵy bir qyzmetkerdiń ortasha aılyq ataýly jalaqysy 80789 teńgeni qurap, ótken jylǵy sáıkes aımen salystyrǵanda - 17,7,
al naqty kóriniste 10,5 paıyzǵa ósti. Bul aqparatty elimizdiń Statıstıka agenttigi taratyp otyr.
Vedomstvonyń habarlaýynsha, salalyq qurylymda eń joǵary jalaqy burynǵydaı ken óndirý ónerkásibi jáne karerlerdi qazýda - 157,3 myń teńge (ortasha respýblıkalyq deńgeıden 1,9 ese), qarjy jáne saqtandyrý qyzmetinde - 156,0 myń teńge (1,9 ese), kásibı, ǵylymı jáne tehnıkalyq qyzmette - 141,1 myń teńge (1,7 ese), ózge de qyzmetter túrlerin usynýda 131,6 myń teńge (1,6 ese) mólsherinde saqtalyp otyr. Eń tómengi jalaqy aýyl, orman jáne balyq sharýashylyǵyndaǵy qyzmetkerler enshisinde. Olardyń ortasha aılyǵy 38,6 myń teńgeni quraıdy. Bul respýblıkalyq kórsetkishten orta eseppen alǵanda 52,1 paıyzǵa kem.
«Óńirlik bóliniste eń joǵary jalaqy Atyraý oblysynda 152,2 myń teńge kóleminde saqtalýda, bul ortasha respýblıkalyq kórsetkishten 1,9 esege joǵary. Jambyl oblysynda atalǵan kórsetkish 53,1 myń teńgeni qurady jáne ol respýblıkalyq deńgeıden 34,3 paıyzǵa tómen», - delingen baspasóz habarlamasynda.
