Aǵymdaǵy jyldyń sońyna qaraı Qazaqstan halqy 100 paıyz spýtnıktik tabaqshalar arqyly sandyq sıgnal alýǵa qol jetkizedi

Bul týraly búgin elordada ótip jatqan «Telecom 2010» forýmy barysynda QR Aqparat jáne baılanys vıtse-mınıstri Sáken Sársenov aıtty.

Atalǵan mınıstrliktiń osyndaı forýmdardy qoldaıtyndyǵyn ári telekommýnıkatsııa salasynda, ınternetti damytý jolynda óte úlken, aýqymdy jumystardyń atqarylyp jatqandyǵyn atap ótken vıtse-mınıstr osy saladaǵy operatorlarmen jospar boıynsha jumys istep jatqandyqtaryn alǵa tartty. Sonymen qatar ol uıaly baılanys operatorlarymen qyzmet tarıfterin tómendetý jónindegi kelissózder júrgizilip jatqandyǵyn atap ótti. «Halqymyz úshin baılanys tarıfteri tómen bolýy kerek. Biz óz tarapymyzdan salalyq kodekske ózgerister engizýdemiz. Osyǵan oraı bul salanyń operatorlarynyń ınternetke jáne uıaly baılanysqa tarıfteri tómen bolǵan jaǵdaıda mınıstrlik olardy qoldaıdy», deıdi S.Sársenov.

Sondaı-aq ol Aqparat jáne baılanys mınıstrligi retteýshi bolǵanymen operatorlardyń jumysyna aralaspaıtyndyǵyn, alaıda tarıfter joǵary bolǵan jaǵdaıda operator jumysyna aralasýǵa quzireti bar ekendigin jetkizip, vedomstvo tarapynan qazirgi ýaqytta atqarylyp jatqan is-sharalarǵa toqtaldy.

«Qazir baılanys salasynda kún saıyn jańa tehnologııalar, jańa baılanys qyzmetteri paıda bolýda. Sonyń ishinde bizdiń mınıstrlikpen sandyq teldıdar boıynsha úlken joba júrgizilip jatyr. Jyldyń aıaǵyna deıin biz spýtnıktik sıgnaldy tarata bastaımyz, ıaǵnı halqymyzdyń 100 paıyzy spýtnıktik tabaqshalar arqyly sandyq sıgnal alýǵa qol jetkizedi. Onyń ishinde 35 telearna tólemaqysyz taratylady. Al 2015 jylǵa deıin efırlik-sandyq sıgnal taratatyn bolamyz. Bul memleketimizdiń qaýipsizdigine tikeleı qatysy bar óte mańyzdy joba», deıdi vıtse-mınıstr.

Sonymen qatar onyń atap ótýinshe, mınıstrlik Qazaqtelekom kompanııasymen birlesip, aýyldyq jerlerdi sapaly ári jyldam ınternet baılanysymen qamtamasyz etý maqsatynda da jumystar atqarý ústinde. «2013 jyldyń basyna qaraı aýyldyq eldi meken turǵyndardyń basym bóligi jaqsy ári sapaly ınternetpen qamtamasyz etiledi», dedi ol óz sózinde.