Aǵymdaǵy jyldyń sońyna deıin turǵyn úı-kommýnaldyq qyzmet salasynda jańa baǵdarlama qabyldanýy tıis - S. Nokın
ASTANA. Sáýirdiń 22-ci. QazAqparat /Qanat Mámetqazyuly/ -Aǵymdaǵy jyldyń sońyna deıin turǵyn úı-kommýnaldyq qyzmet salasynda jańa baǵdarlama qabyldanýy tıis.
Bul týraly búgin QR Parlamenti Májilisinde «Turǵyn úı qatynastaryn retteıtin zańnamany iske asyrýdyń praktıkalyq aspektileri» atty taqyrypta ótken dóńgelek ústel barysynda Qurylys isteri jáne turǵyn úı kommýnaldyq sharýashylyǵy agenttiginiń tóraǵasy Serik Nokın málim etti, dep habarlaıdy QazAqparat.
Sóz arasynda Agenttik tóraǵasy aldaǵy ýaqytta 2020 jylǵa deıingi turǵyn úı-kommýnaldyq sharýashylyqty jańǵyrtýdyń keń aýqymdaǵy jospary ázirlenetinin aıta kele, bunymen qosa elimizdiń aýyldyq jerlerinde sý qubyrlarymen qamtamasyz etýdiń ózekti bolyp otyrǵanyn jetkizdi. Onyń aıtýynsha, búgingi kúni ortalyq atqarýshy organdardyń jáne qoǵamdyq uıymdardyń usynystary qaperge alyna otyryp, osy baǵyttaǵy baǵdarlama jobasy ázirlengen. Bul qujat birqatar mańyzdy baǵyttardy qamtyp otyr. Atap aıtqanda, onda nysandardyń tehnıkalyq jaı-kúıin baǵalaý, óńirlik baǵdarlamalardy ázirlep, bekitý, kóp qabatty turǵyn úılerdi jóndeýdi jáne kútip ustaýdy qamtamasyz etý, baǵa belgileý júıesin jetildirý sharalary qarastyrylǵan.
«Baǵdarlamanyń túpkilikti jobasy aǵymdaǵy jylǵy maýsymnyń 1-ine deıin Úkimetke, qazannyń 1-inde Prezıdent Ákimshiliginiń kelisýine berilýi tıis. Sondaı-aq, baǵdarlama aǵymdaǵy jyldyń sońyna deıin bekitilýi kerek», dedi S. Nokın. Onyń aıtýyna qaraǵanda, atalǵan baǵdarlamanyń tıimdiligin qamtamasyz etý úshin zań jobasy da qosa ázirlenetin bolady. Ondaı qujatta Agenttiktiń jergilikti ókildigi men atqarýshy organdardyń kommýnaldyq saladaǵy quziretteri belgilenedi.
