Aǵymdaǵy jyldyń sońyna deıin apatty mektepter kartasy ázirlenedi - G.Ábdiqalyqova
ASTANA. QazAqparat - Aǵymdaǵy jyldyń sońyna deıin apatty mektepter kartasy ázirlenedi. Bul týraly búgin bilim berý qyzmetkerleriniń respýblıkalyq tamyz keńesinde QR Premer-Mınıstriniń orynbasary Gúlshara Ábdiqalyqova aıtty.
«Úsh aýysymmen sabaq beretin jáne apatty mektepterdi joıý jumystary jalǵasýda. Olardy jergilikti atqarýshy organdarmen jáne jeke sektormen birlesip 5 jyldyq merzim ishinde joıýdyń kezeń-kezeńdik jospary júzege asyrylýda. Aǵymdaǵy jyldyń sońyna deıin apatty mektepter kartasy ázirlenetin bolady», - dedi G.Ábdiqalyqova.
Vıtse-premerdiń atap ótýinshe, kartada óńirlerdegi barlyq apatty mektepter jáne olardyń jyl saıyn joıylý múmkindigi anyq kórsetilýi tıis. Jalpy, aǵymdaǵy jyldyń 1 tamyzynda elimizde 176 apatty mektep qalyp otyr. Al jyl basynda olardyń sany 180 mektep bolatyn. Budan bólek, jyl basynda úsh aýysymmen sabaq beretin 104 mektep bolsa, 1 tamyzda olardyń 103-i qaldy.
«2014-2016 jyldary 258 mektep salý josparlanǵan. Olardyń 192-si 141,3 mlrd. teńge respýblıkalyq bıýdjet qarjysy esebinen salynady», - dedi ol.
