Aǵymdaǵy jyldyń on aıynda el teatrlarynda myńǵa tarta, onyń ishinde 22 jańa spektakl qoıyldy

Bul úlken kórsetkish. Búgin QR Mádenıet jáne aqparat mınıstrliginiń keńeıtilgen alqa májilisi barysynda mınıstr Muhtar Qul-Muhammed osylaı málim etti, dep habarlaıdy QazAqparat.

Mınıstrdiń sózine qaraǵanda, aldaǵy ýaqytta teatr repertýarlaryna úlken nazar aýdarylady. Osyǵan baılanysty Mádenıet jáne aqparat mınıstrliginiń repertýarlyq alqasy qaıta qurylyp, jumysyn bastaǵan. «Teatr repertýarlaryn jańa shyǵarmalarmen tolyqtyrý baǵytynda bıylǵy jyly «Táýelsizdik tolǵaýy» atty konkýrs jarııalanǵan bolatyn. Aldaǵy táýelsizdik merekesi qarsańynda bul konkýrstyń qorytyndysy shyǵarylady. Sol boıynsha jańa týyndylar qoıylymǵa shyǵatynyna senim mol», dedi mınıstr. 

Sonymen birge, ulttyq mádenıet pen ónerdi Qazaqstannan tysqary jerde nasıhattaý máselesine toqtalǵan M. Qul-Muhammed, bıylǵy jyly birqatar memleketterde Qazaqstannyń mádenıet kúnderi sátti ótkendigin aıtty. «Bul sharanyń ózi elimizdiń ónerin sheteldiń, ásirese eýropanyń bıik sahnalarynda pash etýge, nasıhattaýǵa múmkindik berip otyr. Aldaǵy jyly Qazaqstannyń EQYU-ǵa tóraǵalyq etýi barysynda da mádenı baǵyttaǵy yntymaqtastyq sharalaryn jalǵastyra, tereńdete túsetin bolamyz. Soǵan oraı, Eýropanyń úlken sahnalaryna shyǵatyn óner ujymdaryna qoıylatyn talaptar  arta túsedi», dedi M. Qul-Muhammed.