Aǵymdaǵy jyldyń І jartyjyldyǵynda ekonomıkanyń oń ósimi qamtamasyz etildi
ASTANA. 12 shilde. QazAqparat - Aǵymdaǵy jyldyń І jartyjyldyǵynda elimizdiń ekonomıkasy oń qarqynmen ósti.
Aldyn ala baǵalaý boıynsha, atalǵan kezeńde Qazaqstannyń jalpy ishki ónimi 5,6 paıyzǵa ulǵaıdy. Respýblıkalyq bıýdjettiń kirisi artyp, halyqtyń naqty tabysy ósti, dep habarlady pm.kz saıty.
Ekonomıkanyń oń ósimin qamtamasyz etken sharttardyń biri Memleket basshysynyń tapsyrmasy boıynsha el Úkimeti iske asyryp jatqan Indýstrııalandyrý baǵdarlamasynyń oryndalýy bolyp otyr. Ekonomıkalyq damý jáne saýda mınıstrliginiń aqparatyna súıensek, 2012 jyldyń І jartyjyldyǵynyń qorytyndysy boıynsha ónerkásiptik ósim - 101,9 paıyzdy, óńdeýshi ónerkásiptiń ósý qarqyny - 105,7 paıyzdy qurady. Al jyldyń basynan beri negizgi kapıtalǵa salynǵan ınvestıtsııalardyń kólemi 5,9 paıyzǵa ulǵaıdy.
Ekonomıkanyń ósýine oń áserin tıgizip otyrǵan taǵy bir kórsetkish - tutynýshylar suranysynyń ulǵaıýy bolyp tabylady. Atap aıtar bolsaq, bólshek jáne kóterme saýda-sattyq - 14,3 paıyzǵa, kólik qyzmeti - 7,2 paıyzǵa, baılanys qyzmeti - 13,3 paıyzǵa ósip otyr.
І jartyjyldyqta sondaı-aq, Qazaqstannyń qarjy naryǵynda depozıtterdiń 14,8 paıyzǵa, nesıelerdiń - 17,4 paıyzǵa ósýi baıqaldy.Ulttyq qordy qosa eseptegende, elimizdiń halyqaralyq rezervteri jyldyń basynan beri 12,9 mlrd. AQSh dollaryna ósip, 85,9 mlrd. AQSh dollaryn qurap otyr.
Ekonomıkalyq damý jáne saýda mınıstrliginiń aqparyna súıensek, respýblıkalyq bıýdjettiń kirisi 25,5 paıyzǵa ulǵaıyp, 2,7 trln. teńge somany qurap otyr. Respýblıkada makroekonomıkalyq turaqtylyq saqtalýda. Qańtar-maýsym aılarynda ınflıatsııa - 2,7 paıyzdy qurady, salystyrar bolsaq, ótken jyldyń sáıkes kezeńinde bul kórsetkish 5,1 paıyz bolǵan.
Qańtar-sáýir aılarynda elimizdiń syrtqy saýda aınalymy 21,6 paıyzǵa ulǵaıdy, onyń ishinde, eksport - 18,4 paıyzǵa, ımport -30 paıyzǵa ósti.
Al turǵyn úı qurylysy 20,8 paıyz ósimdi qurap otyr. Qurylys salasyna tartylǵan ınvestıtsııa 134 mlrd. teńgeni qurady, 2,4 mln. sharshy metr turǵyn úı paıdalanýǵa berildi.
Ekonomıka ósiminiń oń qarqyny qazaqstandyqtardyń tabystarynyń da ósýine áserin tıgizip otyr. Jyldyń basynan beri halyqtyń naqty tabysy -12,8 paıyzǵa, naqty jalaqylary - 11,5 paıyzǵa ósti. Mamyr aıynda jumyssyzdyq deńgeıi -5,3 paıyzdy qurady.
Halyqtyń ál-aýqatyn úzdiksiz arttyrý Úkimettiń negizgi basymdyqty mindeti bolyp tabylady. Elbasynyń tapsyrmasy boıynsha aldaǵy bes jyldyń ishinde Qazaqstan tabysy joǵary deńgeıdegi elderdiń qataryna qosylýy kerek. 2016 jylǵa qaraı jan basyna shaqqandaǵy JІÓ 15 myń AQSh dollarynan kem bolmaýy tıis.
