Aǵymdaǵy jyldyń 9 aıynda tirkelgen órt sany 14,4 paıyzǵa artty
ASTANA. Qazannyń 11-i. QazAqparat /Marlan Jıembaı/ - Aǵymdaǵy jyly ótken jyldyń qańtar-qyrkúıek aılarymen salystyrǵanda tirkelgen órt sany 14,4 paıyzǵa artyp, al materıaldyq shyǵyn 8,06 paıyzǵa tómendedi. Bul týraly búgin elordada ótken baspasóz máslıhaty barysynda QR Tótenshe jaǵdaılar mınıstrligi baspasóz qyzmetiniń qyzmetkeri Lıýbov Shaposhnıkova málim etti.
Vedomstvonyń júrgizgen saraptamasyna sáıkes, aǵymdaǵy jyldyń 9 aıynda respýblıka aýmaǵynda 13 myńnan astam óndiristik jáne turmystyq órt oryn alǵandyǵyn atap ótken ol: «Olarda 808 adam zardap shekti, onyń 330-y qaza taýyp, 478-i túrli dárejede dene jaraqatyn alyp, kúıik shaldy», - dedi.
L.Shaposhnıkovanyń alǵa tartqan derekterine qaraǵanda, TJM mamandary tilsiz jaýdan 2026 adamnyń ómirin saqtap qalǵan. Órt ákelgen shyǵyn 3 mıllıard 192 mln. teńgeni quraıdy.
«Turǵyn úı sektorynda oryn alatyn órt sanynyń artýy baıqalady. Máselen, 2009 jyldyń 9 aıynda 7893 órt tirkelse, aǵymdaǵy jyly bul san 8873-ke jetti», - dedi ol óz sózinde.
Onyń aıtýynsha, oryn alatyn órttiń basym bóligine órt qaýipsizdigin saqtamaý, elektr jabdyqtaryn durys paıdalanbaý, balalardyń otpen oınaýy sebep bolýda. Sondaı-aq mas kúıinde shylym shegýdiń saldarynan da tótenshe oqıǵa kóp oryn alady. Máselen, aǵymdaǵy jyly mas kúıinde temeki shegýdiń saldarynan tutanǵan órtten 191 adam kóz jumǵan. Bul qaza tapqandardyń jalpy sanynyń 58 paıyzy.
