Aǵymdaǵy jyldyń 8 aıynda Qazaqstannyń ІJÓ ósimi 0,3 paıyzdy qurady - Bıshimbaev
ASTANA. QazAqparat - Aǵymdaǵy jyldyń 8 aıynda Qazaqstannyń ІJÓ ósimi 0,3 paıyzdy qurady. Bul týraly búgin Aqordada Elbasy Nursultan Nazarbaevtyń tóraǵalyǵymen ótip jatqan Úkimettiń keńeıtilgen otyrysynda QR Ulttyq ekonomıka mınıstri Qýandyq Bıshimbaev málim etti.
«Ekonomıka tamyz aıynda 0,1 paıyzǵa ósim kórsetti . Aǵymdaǵy jyldyń 8 aıynyń qorytyndysynda ІJÓ ósimi 0,3 paıyzdy qurady. Maýsym aıynan ekonomıkada oń ósim baıqalady. «Nurly jol» baǵdarlamasy men daǵdarysqa qarsy sharalar iske qosyldy. Azdaǵan ǵana ósim bolsa da Qazaqstandaǵy ahýal seriktes elderden birshama jaqsy. Óıtkeni, Reseı, Belarýs, Qyrǵyzstanda ІJÓ quldyraýy baıqalady»,- dep atap ótti ol.
Mınıstrdiń aıtýynsha, ekonomıka ósimi qurylysta, kólik salasynda, aýyl sharýashylyǵynda, óńdeý ónerkásibinde, qyzmet sektorynda ónim kóleminiń ósýi esebinen qamtamasyz etildi. Alaıda taý-ken óńdeý ónerkásibinde 4,8 paıyzǵa artta qalý baıqalady. Bul munaı, kómir, temir kenderin óndirýdiń qysqarýymen baılanysty.
«Qurmetti Nursultan Ábishuly! Siz árýaqytta da ekonomıkany ártaraptandyrýdyń mańyzdylyǵyn basa aıtasyz jáne ındýstrııalandyrý baǵdarlamasynyń arqasynda búginde shıkizattyq emes sektor taý-ken ónerkásibindegi óndiristiń tómendeýiniń óteýi bolyp otyr», - dedi Q.Bıshimbaev.
