Aǵymdaǵy jyldyń 3 aıynda alaıaqtardyń is-áreketinen memleketke 1,3 mlrd teńge zalal keltirildi - Qarjy polıtsııasy
ASTANA. Mamyrdyń 20-sy. QazAqparat /Ernur Aqanbaı/ - Aǵymdaǵy jyldyń 3 aıynda elimizdegi alaıaqtardyń jasaǵan is-áreketinen memleketke 1,3 mlrd teńge zalal keltirildi.
Bul týraly búgin Astanadaǵy brıfıngte QR Ekonomıkalyq qylmysqa jáne sybaılas jemqorlyqqa qarsy kúres agenttiginiń (qarjy polıtsııasy) resmı ókili Murat Jumanbaı málim etti.
«Aǵymdaǵy jyldyń 3 aıynda qarjy polıtsııasy organdary alaıaqtyq faktileri boıynsha 583 qylmystyq is qozǵady, 483 qylmystyq is sotqa joldandy. Anyqtalǵan zalal somasy 2 mlrd. teńgeden asty. Máselen, alaıaqtardyń is-áreketinen memleketke 1,3 mlrd teńge, al azamattar men uıymdarǵa 700 mln. teńgeden astam zalal keltirildi», dedi brıfıngte M. Jumanbaı.
Onyń aıtýynsha, Qarjy polıtsııasy organdarymen qabyldanǵan is-sharalar nátıjesinde 1,2 mlrd. teńgeniń orny toltyryldy. «Qylmystyq zańnamamen aldaý nemese senimge qııanat jasaý arqyly bóten múlikti urlaý úshin eń aýyr jaza retinde múlikti tárkileýmen 10 jylǵa bas bostandyǵynan aıyrý kózdelgendigine qaramastan, alaıaqtyq keń taraǵan jáne qoǵamdyq qaýiptiligi joǵary qylmys bolyp qalyp otyr», deıdi Qarjy polıtsııasynyń resmı ókili.
