Aǵymdaǵy jyldyń 11 aıynda Qazaqstannyń ІJÓ ósimi 4,2 paıyzdy qurady

ASTANA. QazAqparat - Aǵymdaǵy jyldyń 11 aıynda Qazaqstannyń ishki jalpy ósimi 4,2 paıyzdy qurady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Ulttyq ekonomıka vıtse-mınıstri Mádına Ábilqasymova málim etti.

«Ulttyq ekonomıka mınıstrliginiń aldyn ala baǵalaýynsha, 2014 jyldyń qańtar-qarasha aılaryndaǵy ishki jalpy ónim ósimi 4,2 paıyzdy qurady. Taýarlar óndirisiniń naqty kólem ındeksi 100,2, al qyzmet óndirisiniń jalpy kólem ındeksi 106 paıyz deńgeıinde qalyptasty»,- dedi ol.

Sonymen qatar vıtse-mınıstrdiń atap ótýinshe, jyl basynan beri ınflıatsııa 6,9 paıyzdy quraǵan. Bul ótken jyldyń sáıkes kezeńimen salystyrǵanda 2,8 paıyzdyq tarmaqqa joǵary.

«Inflıatsııa ósimi azyq-túlik emes taýarlar baǵasynyń 7,8 paıyzǵa, azyq-túlik taýarlary baǵasynyń 6,9 paıyzǵa, al aqyly qyzmetter baǵasynyń 6,1 paıyzǵa ósýi esebinen qalyptasty», - dedi M.Ábilqasymova.