Aǵymdaǵy jyldan bastap elimizde 5 konstrýktorlyq bıýro ashylady
ASTANA.Tamyzdyń 25-i. QazAqparat /Marlan Jıembaı/ - Aǵymdaǵy jyldan bastap elimizde 5 konstrýktorlyq bıýro ashylady. Bul týraly búgin elordada ulttyq ınnovatsııalyq júıeni qurýǵa arnalǵan brıfıng barysynda QR Indýstrııa jáne jańa tehnologııalar vıtse-mınıstri Nurmuhambet Ábdibekov aıtty.
Onyń atap ótýinshe, qazirgi ýaqytta Qazaqstanda 2 konstrýktorlyq bıýro óz jumysyn bastap ta ketken. Olardyń biri Astana qalasynda ornalasqan kóliktik mashına jasaý konstrýktorlyq bıýrosy bolsa, ekinshisi de osy salany qamtıdy. Alaıda ol taý-ken salasyndaǵy qural-jabdyqtardy jobalaýshy mekeme retinde óz qyzmetin bastaǵan.
«Kelesi jyly bizdiń josparymyzǵa sáıkes ashylatyn bıýro da mashına jasaý salasyna qatysty bolady. Biraq aýyl sharýashylyǵy tehnıkalaryn jobalaıdy», dedi vıtse-mınıstr.
N.Ábdibekovtiń paıymynsha, elimizde jumys istep turǵan mashına jasaý zaýyttary men mekemeleri bul múmkinshilikti paıdalanyp, ózderiniń syrttan transfert arqyly alýǵa nıettengen tehnologııalardyń qujattaryn osy bıýrolar arqyly satyp alýǵa, jasatýǵa múmkindik týady.
Sonymen QR Indýstrııa jáne jańa tehnologııalar mınıstrliginiń josparyna sáıkes, 2011 jyldyń sońyna deıin Petropavlda munaı-gaz qural-jabdyqtary, Kókshetaýda aýyl sharýashylyǵy tehnıkalary, al Almaty qalasynda prıbor jasaý boıynsha konstrýktorlyq bıýrolar qurylmaq.
