Aǵymdaǵy josparlar bıýdjetterdiń barlyq deńgeılerinde asyra oryndaldy - Qarjy mınıstrligi
ASTANA. QazAqparat - Aǵymdaǵy jyldyń 9 aıynda memlekettik qarjy salasynda oń kórsetkishterge qol jetkizildi. Bul týraly Úkimet otyrysynda 2017 jyldyń 9 aıyndaǵy memlekettik bıýdjettiń atqarylý qorytyndylary týraly baıandaǵan Qarjy mınıstri Baqyt Sultanov málim etti, dep habarlaıdy QazAqparat.
«Kirister boıynsha aǵymdaǵy josparlar bıýdjetterdiń barlyq deńgeılerinde asyra oryndaldy, ıaǵnı Memlekettik bıýdjet - 103,9 paıyzǵa, respýblıkalyq bıýdjet - 102,1 paıyzǵa jáne jergilikti bıýdjetter - 107,8 paıyzǵa. Jyldyq jospardy tolyǵymen oryndaýda eshqandaı problema joq», - deıdi Baqyt Sultanov.
Onyń paıymynsha, túsimderdiń artyǵymen oryndalýyna salyqtyq tekserýlerdi qysqartý esebinen bıznes-klımatty jaqsartý boıynsha qabyldanyp jatqan sharalar da áser etti.
«Shyǵystar boıynsha ıgerý paıyzy barynsha joǵary: memlekettik bıýdjet - 98,8 paıyz, respýblıkalyq bıýdjet - 99,3 paıyz jáne jergilikti bıýdjet - 98,2 paıyz. Shyǵystardyń joǵary atqarylýyna onlaın-monıtorıngteý men qarajatty ıgerý boıynsha ortalyq jáne jergilikti atqarýshy organdarmen júrgizilgen selektorlyq keńester arqyly «qolma-qol basqarý sharalary» yqpal etti», - dedi mınıstr.
Sonymen qatar ol memlekettik satyp alý burynǵydan da tez jáne aıqyn bolǵanyn atap ótti. Aǵymdaǵy jyly memlekettik satyp alýdyń barlyq kezeńderi elektrondyq formatqa aýystyryldy.
«Baqylaý jumysynda júrgizilip jatqan sharalardyń pármendiligi kúsheıtildi. Memlekettik satyp alý rásimderin kameraldyq baqylaý tolyǵymen avtomattandyryldy. Nátıjesinde, memlekettik satyp alýdyń rásimderinde buzýshylyqtar 5 esege azaıdy» ,- dedi Baqyt Sultanov.
