Aǵymdaǵy oqý jylynda memlekettik mektepterdiń úlesi 98,6 paıyzdy qurady
ASTANA. QazAqparat - 2013/2014 oqý jylynyń basynda Qazaqstan Respýblıkasynda 7561 kúndizgi jalpy bilim beretin mektepter jumys istedi, olardyń 7458-i nemese 98,6% memlekettik bolyp tabylady.
Aldyńǵy oqý jylymen salystyrǵanda mektepterdiń jalpy sany 1% tómendedi. Bul týraly QR Statıstıka agenttiginiń málimetinde habarlandy.
Atap aıtqanda, oqý oryndary túrleri boıynsha kúndizgi jalpy bilim beretin mektepter bastaýysh, negizgi jáne orta mektepterge bólinedi. Jalpy bilim beretin mektepterdiń jalpy sanynda bastaýysh mektepterdiń úles salmaǵy 11,7 paıyzdy, negizgi - 14,4%, orta - 70% qurady.
Bastaýysh mektepterdiń jalpy sanynan 95,8% aýyldyq eldi mekende ornalasqan, negizgi jáne orta mektepter boıynsha bul kórsetkish tıisinshe 92,5% jáne 70,5% qamtydy.
Oqý jylynyń basyna kúndizgi jalpy bilim beretin mektepterdegi oqýshylar sany 2581,6 myń adamǵa jetip, ol ótken oqý jylymen salystyrǵanda 1,9%-ǵa kóbeıdi.
