Aǵymdaǵy aptada elimizde zańsyz ań aýlaýmen aınalysýdyń birqatar faktileri anyqtaldy
ASTANA. 8 qarasha. QazAqparat - Osy aptada elimizde brakonerlikpen aınalysýdyń birqatar faktileri anyqtaldy.
«Shyǵys Qazaqstan oblysynyń Zyrıan qalalyq aýdandyq ishki ister bóliminiń tabıǵat qorǵaý polıtsııasynyń ınspektory «Brakoner» jedel tabıǵat qorǵaý is-sharalaryn júrgizý barysynda Pýtıntsev selosynan 50 shaqyrym qashyqtyqtaǵy qonysta 1980 jyly týǵan Katonqaraǵaı aýdany Novo-Berezovka aýylynyń turǵynyn zańsyz ádispen maral ustaǵan jerinde áshkereledi. Oqıǵa bolǵan jerden eki bas maral men bolattan jasalǵan eki tuzaq tabylyp, tárkilendi. Keltirilgen zalal 692 000 teńgege baǵalanyp otyr. Brakonerlik faktisi boıynsha QR Qylmystyq Kodeksiniń 288-babynyń 1-tarmaǵy boıynsha qylmystyq is qozǵaldy», - delingen QR QOSRM baspasóz qyzmetiniń málimetinde.
Sonymen qatar 2013 jyldyń 6 qarashasynda QR Іshki ister mınıstrliginiń Baıqońyr qalasyndaǵy ókildiginiń qyzmetkerleri Qarmaqshy aýdanynyń Tóretam kentinde josparly sharalardy júrgizý barysynda 1963 jyly týǵan Qazaly aýdany turǵynynyń basqarýyndaǵy «Folksvagen Passat» markaly avtokólikti toqtatyp, tekserý ótkizdi. Tekseris nátıjesinde avtokólik ishinde bas-aıaqtary jáne ishek-qaryndary joq eki kıik eti tabylǵan. Kúdikti azamat, oqıǵa ornyna shaqyrylǵan qalalyq prokýratýra men jedel tergeý toby qyzmetkerleriniń aldynda bergen túsiniktemesinde, kıik etin Qazaly aýdanynda beıtanys adamdardan satyp alǵandyǵyn jetkizgen. Jınalǵan derekti materıaldar Qazaly aýdandyq ІІB tapsyrylyp, tıisti saraptama jáne tergeýge deıingi tekserý jumystary júrgizilýde.
Munymen qosa sol kúni Qyzylorda oblysynyń Qarmaqshy aýdanynda «Ohotzooprom» memlekettik kásiporyny ınspektorlarynyń «Alty qudyq» óńirinde ótkizgen kezekti is-sharalary barysynda ishinde úsh azamat otyrǵan «Nıva» markaly avtokóligin toqtatyp, tekserýden ótkizdi. Sonyń nátıjesinde avtokóliktiń júk salǵyshynan 12 kalıbrli jalǵyz uńǵyly ańshy myltyǵy, alty dana atylmaǵan oqtar jáne qapqa oralǵan basy men terisi joq belgisiz (aqbókenge uqsas) ańnyń eti tabylǵan. Jınalǵan derekter men aıǵaqtar Qarmaqshy AІІB-ne tapsyryldy. Oqıǵa boıynsha tergeýge deıingi tekserý jumystary júrgizilýde.
