Aǵymdaǵy 2010 jyl ǵalamshar boıynsha temperatýralyq rekordqa toly jyl bolyp otyr
ASTANA. Tamyzdyń 9-y. QazAqparat - Aǵymdaǵy 2010 jyl ǵalamshar boıynsha temperatýralyq rekordqa toly jyl bolyp otyr, bul týraly brıtandyq «Taıms» gazetine silteme jasap ITAR-TASS agenttigi habarlady.
Jyldyń aıaqtalýyna áli 5 aı qalǵanyna qaramastan, qazirdiń ózinde álemniń 16 eli óz aýmaǵynda ulttyq rekordtar tirkep otyr. Onyń ishinde, 15 elde eń joǵarǵy temperatýra rekordy tirkelse, bir elde - eń tómengi temperatýra tirkelip otyr.
Birneshe aıdan beri aptap ystyqtan, sonyń saldarynan týyndaǵan orman órtinen zardap shegip otyrǵan Reseıdi aıtpaǵanda, ońtústikten - soltústikke qaraı Fınlıandııadan Kıprge deıingi aralyqta, al batystan -shyǵysqa qaraı Kolýmbııadan Solomon araldaryna deıingi aralyqta kóptegen jerlerde ystyqtyń eń joǵarǵy kórsetkishi tirkelip, buryn-sońdy tirkelmegen 44 gradýsqa deıin kóterilgen óńirler bar.
Al onsyz da ystyq Parsy shyǵanaǵy elderinde, onyń ishinde Katar, Saýd Arabstany, Irak jáne Kýáıt elderinde aýa temperatýrasy tarıhı maksımýmǵa jetip, 50 gradýstan assa, Pákistanda tipti 53,5 gradýsqa deıin kún ysyǵan. Bul jańa azııalyq rekord bolyp tabylady.
