Aǵylshyndar úılený toılaryn kıiz úılerde ótkizip jatyr (FOTO)
ASTANA. QazAqparat - Anglııada úılený toılaryn jazda dızaınerlik kıiz úılerde ótkizý sánge aınaldy, dep jazady Yvision.kz saıty.
«Seriktesim ekeýimiz kıiz úılerdi jaqsy kóremiz, sebebi olar ádemi, keń jáne berik etýge óte qolaıly ári kez kelgen jerge ornatýǵa bolady. Kıiz úı kúıeý jigit pen qalyńdyqqa olardyń úlken merekesiniń ózgesheligin tanytý erkindigin beredi», - dedi «Úılený toılaryndaǵy kıiz úıler» bıznes-jobasy avtorlarynyń biri, aǵylshyn azamatshasy Lızzı.
Kıiz úıdegi úılený toıy Ulybrıtanııa men Kanadada úlken tanymaldylyqqa ıe bolyp otyr.
«Qoldan jasalǵan kıiz úılerdi Ýelstegi sheberler daıyndaǵan. Materıal retinde jergilikti ormandardaǵy talshyn aǵashy paıdalanyldy», - dep jazady saıt.
Aǵylshyndyq ıvent-agenttiginiń eń úlken kıiz úıdegi toıy 90 qonaqqa laıyqtalǵan.
Kıiz úıdi jalǵa alý tólemi onyń ózgesheligine baılanysty shamamen 3-5 myń aǵylshyndyq fýnt sterlıng ekeni atap ótiledi. 
