Aǵylshyn tilinde sabaq beretin muǵalimder JOO-da ǵana daıarlanady
NUR-SULTAN. QazAqparat - QR Bilim jáne ǵylym mınıstri Kúlásh Shámshıdınova mektep muǵalimderin aǵylshyn tiline úıretýge qatysty pikir bildirdi, dep xabarlaıdy QazAqparat tilshisi.
«Negizi, aǵylshyn tili boıynsha úsh aılyq kýrstarǵa qatysqan mektep muǵalimderi taǵy alty aılyq kýrstan ótken bolatyn. Degenmen, biz atalǵan máseleni qaıta qarastyryp shyqtyq. Kelesi jyldan bastap muǵalimderdiń aǵylshyn tili boıynsha kásibı biliktiligin arttyrýǵa arnalǵan qarjyny, ol shamamen, 4 mıllıard teńgeni basqa maqsattarǵa jumsaıtyn bolamyz. Al aǵylshyn tilinde sabaq beretin muǵalimder tek joǵary oqý oryndar arqyly ǵana daıarlanady. Iá, mektepte tájirıbesi bar muǵalim bar, erteń joǵary oqý ornynan keletin jas mamandar bar. Sol sebepti biz qazirgi muǵalimlerdi arnaıy kýrstarǵa jibergen bolatynbyz», - dedi K.Shámshıdınova Úkimet úıinde ótken baspasóz máslıxatynda.
Mınıstrdiń aıtýynsha, xımııa, fızıka, bıologııa men ınformatıkadan sabaq beretin 14 myń muǵalimdi aǵylshyn tili kýrstarynan ótkizý josparlanǵan bolatyn. Osy ýaqytqa deıin 11 myń muǵalim óz kýrstaryn aıaqtady.
«Endi, biz 2019 jyly bastalǵan kýrstardy toqtata almaımyz. Ol daıyndyq jalǵasyp jatyr. Osydan keıin osy saladaǵy mamandardy tek joǵary oqý oryndary arqyly ǵana daıarlaımyz», - dep atap kórsetti K.Shámshıdınova.
Aıta keteıik, buǵan deıin QazAqparat tilshisine suxbat bergen QR Bilim jáne ǵylym vıtse-mınıstri Bıbigúl Asylova aǵylshyn tilinde sabaq beretin muǵalimderdi daıarlaý máselesin túsindirgen bolatyn. «Negizi, 2016 jyly jańartylǵan bilim baǵdarlamasy qolǵa alynǵanda biz birden bakalavr men magıstratýra boıynsha maman daıarlaýǵa kiristik. Dál osy mamandar xımııa, bıologııa, fızıka sııaqty jaratylystaný-matematıka pánderin aǵylshyn tilinde oqytady. 2020-2021 jyldary bakalavr men magıstranttar oqýdy aıaqtap, mektepterge kele bastaıdy. Olardyń barlyǵy - jańadan keletin muǵalimder. Biz olardy memlekettik tapsyryspen arnaıy oqytyp jatyrmyz», - dedi B.Asylova QazAqparat tilshisine bergen suxbatynda.
Vıtse-mınıstrdiń aıtýynsha, jas mamandardyń bári otandyq joǵary oqý oryndarynda bilim alyp júr. Olar birinshi kýrstan bastap tek aǵylshyn tilinde ǵana oqytady. Bakalavr da, magıstratýra da solaı. «Magıstranttar oqýdy aıaqtaýǵa jaqyn. Al bakalavr 2020-2021 jyldary oqýdy aıaqtaıdy. Olardyń barlyǵy mektepke baryp, úsh jyldaı jumys isteýge mindetti. Memlekettik tapsyrystyń sharty solaı», - deıdi B.Asylova.
