Aǵylshyn tilinde áńgime jazǵan oqýshy AQSh-qa barady
AQTAÝ. QazAqparat - Aqtaý qalasyndaǵy Nazarbaev Zııatkerlik mektebiniń 11-synyp oqýshysy aǵylshyn tilinde shyǵarma jazyp, AQSh-taǵy oqý kýrsyna joldama aldy, dep habarlaıdy QazAqparat tilshisi.
Asparýh Sultanmurat AQSh memlekettik departamentiniń bilim jáne mádenıet baǵdarlamalary bıýrosynyń qoldaýymen uıymdastyrylǵan «Jeliler arasynda: álem jáne jazýshylyq tájirıbe» atty eki aptalyq baǵdarlamasynyń jeńimpazdarynyń biri atandy. Sondaı-aq ol Aıova ýnıversıtetinde bıylǵy jyldyń 13-27 shildesi aralyǵynda ótetin kýrsqa joldama aldy. Aǵylshyn tiliniń sheberleri men jazýshylyq qabileti bar balalardyń basyn qosatyn oqý kýrsyna 15-18 jastaǵy 30 jas iriktep alynǵan.
«Baǵdarlamaǵa qatysý úshin aldymen, baıqaýda óz qabiletińdi dáleldeı alýyń kerek. Ol úshin ártúrli taqyrypta aǵylshyn tilinde esse jazý jáne 6-8 betten turatyn proza nemese poezııa jazý tapsyrmalary berildi. Tarıh pánine qyzyǵýshylyǵym joǵary bolǵandyqtan tarıhı oqıǵa jelisindegi drama jazýdy uıǵardym. «The Crimson Glow of Spring» atty shyǵarmamda reseı-frantsýz soǵysynda áke-sheshesinen aıyrylǵan balanyń taǵdyryn sýrettedim. Ol sýret salýdy unatady jáne ózgelerdiń aıtqanyna qaramastan súıikti isimen aınalysýdy toqtatpaıdy»,- deıdi Asparýh.
Oqýshy aǵylshyn tilin úırengendi erekshe jaqsy kóredi. Óıtkeni, kóptegen paıdaly derekterdi túpnusqada meńgerý arqyly birshama múmkindikterdi alýǵa bolatynyn esepteıdi. Jeńimpazdyń tildi meńgerýdegi bilimin arttyrýda aǵylshyn tili páni muǵalimi Nurzada Ermaǵambetova men shet tili muǵalimi Jacob Labuschagne kóp eńbek sińirgen. Zııatker bıylǵy jyly IELTS emtıhanynan 6,5 ball jınaǵan.
«Baǵdarlama maǵan óte paıdaly bolatynyna senimdimin. Óıtkeni AQSh-qa sapar esten ketpes áser men til meńgerýge tamasha múmkindik syılaıtynyna úmittenemin. Kýrs barysynda alǵan bilimimdi sheteldik ýnıversıtetterge bilim grantyna úmitker bolǵanda barynsha paıdalanamyn. Atalǵan baıqaýda tehnıkalyq turǵydan kómek bildirgen mektebimizdegi kásibı baǵdar berý jónindegi keńesshi Saýle Aldabergenovaǵa, til meńgerýge kómek kórsetken barsha ustazdaryma alǵys bildiremin, - deıdi jas qalamger.
